pb 13 v (vol. 1)dit chevallier.
SHF 1-25 syncAe jeune roy Edouart d’Angleterre pour mieulx festier ces seingneurs et toute leur compaignie tint une grant court le jour de la Trinité en la maison des freres meneurs la ou il et madame sa mere estoient herbergiéz, et tenoient leur tinel, chascun par lui. C’est assavoir le roy des chevalliers et la royne de ses dames, dont elle avoit grant foison avecques elle.
¶ A celle court ot bien le roy VC
chevalliers et en firent XV nouveaulx. Et madame la royne
tint sa court et sa feste ou dortouer, et ot bien seant a table LX dames qu’elle avoit priees et mandees pour mieulx festier le dit messire Jehan
de Haynault et les autres seingneurs. La peust on veoir grant noblesce de bien
servir de grant planté de mez et d’entreméz si estranges et si desguiséz que on ne
les pourroit devisier. La peust on veoir dames noblement parees et richement
attournees qui eust loisir. Mais adonc ne pouoit on avoir loisir ne de dancier ne de plus festoier.
Car tantost aprés disner vint un grant hustin qui se commença entre les garçons des Hanuyers et les archiers d’Angleterres, qui entr’eulx estoient logiéz et hebergiéz, pour l’occasion d’un geu de
dez, de quoy grant mal vint si comme vous orréz. Car ainsi que ces garçons se
combatoient a aucuns de ces Anglois, tous les autres archiers qui
estoient logiéz en ycellui faubourc furent tantost assembléz a tous leurs arcs
appareilliéz et se bouterent ou hayhay, et navrerent de commencement tout plain
des garçons aux Hanuyers. Si leur couvint retraire a leurs hostelz.
Les plus des chevalliers et de leurs maistres estoient encores en la court, qui
de ce ne savoient riens. Et tantost qu’ilz ouyrent nouvelles de ce hustin, ilz se trairent au plus tost qu’ilz peurent chascun vers son hostel, qui pot entrer, et qui ne
pot entrer dedens, il lui couvint demourer dehors en grant peril. Car ces archiers,
qui estoient bien II mille, avoient le deable ou corps tant traioient
dispersement pour tout tuer, seigneurs et varlés. Et vouloit on dire et supposer que c’estoit fait tout avisé et pourparlé
d’aucuns des amis des Despensiers et du conte d’Arondel, qui avoit esté mis a fin par messire Jehan de Haynault, si comme
vous avéz oy recorder cy dessus. Si s’en vouloient contrevengier aux Hanuyers, et mesmement a messire Jehan de Haynault se ilz
eussent peu, et bien se mistrent en peinne, si comme vous orréz. Car encore les Anglois et les Anglesches de qui les hostelz estoient
clouoient et barroient leurs huis et leurs fenestres au devant des Hanuyers et ne les laissoient dedens entrer. Touteffois, il en y ot aucuns qui entrerent par derriere en leurs hostelz et s’armerent vistement.
¶ Quant ilz furent arméz, ilz n’oserent yssir hors par devant pour les sayettes, mais yssirent hors par derriere, par les courtilz, et rompirent les clostures et potilz et attendirent l’un l’autre en une place qui la estoit, tant que ilz furent bien cent ou plus bien arméz et bien autant tous desarméz qui ne pouoient entrer en leurs hostelz.
¶ Quant ceulx arpb 14 r (vol. 1)