pb 123 v (vol. 1)qui riens lui vausist, si fut tasté et enquis, et la lettre trouvee sur lui. Si fut mené en prison et gardé jusques au matin, que les seigneurs de l’ost furent levéz, si furent tantost informéz de la prise du dit messaigier. Adonc se trairent ils tous ensemble en la tente du conte de Laille, la fut la lettre leue que les chevaliers envoyent au conte d’Erby. Si orent tous grant joye quant ilz sorent la verité que les Englois qui en la garnison se tenoient estoient si astrains qu’ils ne se pouoient plus tenir. Si que pour eulz plus grever, ilz prindrent le varlet et li pendirent les lettres au col et le mistrent tout en un mont en la fonde d’un engin, et puis le renvoierent dedens Auberouce. Le varlet chey tout mort devant les varlés qui la estoient et qui furent moult esbaiz et desconfortéz quant ils virent le varlet et les lettres liees au col. "Ha!" distrent ils, "nostre messagier n’a pas fait son messaige, or ne savons mais qu’avisier, ne quel conseil avoir qui nous vaille." A ces cops estoient montéz a cheval le conte de Pierregort et monseigneur Rogier de Pierregort son oncle, monseigneur Charles de Poitiers, le viconte de Carmaing et le sire de Duras, et passerent devant les murs de la forteresse au plus pres qu’ils porent, si escrierent a ceulz dedens et leur distrent en galoys : "Seigneurs, seigneurs englois, demandéz a vostre messagier ou il trouva le conte d’Erby si appareillié quant a nuit se parti de vostre forteresse et ja est retourné de son voiaige." Adonc respondi monseigneur Franke Halle qui ne s’en pot abstenir et dist: "Par foy, seigneurs, se ceans nous sommes encloz, nous en istrons bien quant Dieu vouldra et le conte d’Erby, et pleust a Dieu qu’il sceust en quel parti nous sommes, se il le savoit, il n’y auroit si advisé des vostres qui ne ressoignast les champs. Et se vous li vouléz signifier, l’un des nostres se mettra en vostre prison pour rançonner ainsi que on raençonne un gentil homme." Adont respondirent les Françoiz "Nennil, nennil, les parçons ne se porteront pas ainsi. Le conte d’Erby le saura tout a temps, quant par noz engins nous aurons abatu rez a rez de terre le chastel, et que vous pour voz vies sauves vous seréz renduz simplement." "Certainement," respondi monseigneur Franke de Halle, "ce ne sera ja que ainsi nous rendons pour estre tous mors ceans." Adont passerent les chevaliers françois oultre et revindrent a leurs logeis, et les trois chevaliers englois demourerent dedens Auberouce tous esbais au voir dire. Car ses pierres d’engin leur bustoient si grans horions que ce sembloit fouldre qui descendist du ciel quant elles frappoient contre les murs du chastel.

Toutes les parolles et les devises et le couvenant du messaigier, comment il avoit esté pris devant Auberoyce et l’estat de la lettre et la neccessité de ceulx dedens furent sceues et rapportees a Bourdeaux au conte d’Erby et a monseigneur Gautier de Mauni par une leur espie qu’ilz avoient envoié en l’ost, et qui leur deist bien:"Certes, messeigneurs, a ce que j’ay peu entendre, se voz chevaliers ne sont confortéz dedens III jours ils serons ou mors ou pris, et voulentiers se rendroient se on les pb 124 r (vol. 1)