pb 121 v (vol. 1)fortement et appertement en plusieurs lieux, et ensonnierent ceuls de la ville tellement qu’ils ne savoient au quel entendre. Les bourgois de la ville, qui doubterent a perdre leurs biens, leurs femmes et leurs enfens, regarderent que a la longue ils ne se pouoient tenir, si prierent a deux des chevaliers qui la estoient qu’ils traictassent a ces seigneurs d’Angleterre par quoy ils demourassent en paix et que le leur feust sauve. Les chevaliers, qui aussi veoient bien le peril en quoy ils estoient, s’i accorderent asséz legierement, et envoyerent un herault depar eulz au conte d’Erby pour avoir respit un jour tant seulement et parlement de composicion. Le herault vint devers le dit conte, qu’il trouva sur les champs asséz pres de la ville, et lui remonstra ce pourquoy il estoit la envoyé. Le conte s’i accorda et fist retraire ses gens, et s’en vint jusques aus barrieres parlamenter a ceulz de la ville. Deléz lui estoit le baron de Stanfort et le seigneur de Maun. La furent en grant parlement ensemble, car le conte d’Erby vouloit qu’ils rendissent simplement la ville, et ils ne l’eussent jamais fait. Touteffoiz accort s’i porta que ceuls de la ville de Laille se mettroient en obeissance du roy d’Angleterre, et de ce envoyerent XII de leurs hommes en la cité de Bourdeaux en nom de creant. Et sur ce les chevaliers et les escuiers françois qui la estoient pouoient partir et traire quelque part qu’ilz vouloient. Ainsi ot le conte d’Erby en ce temps la ville de Laille en Gascoingne, et se partirent sur son saufconduit les gens d’armes qui dedens estoient et s’en alerent devers La Riolle.
SHF 1-215 sync Comment la garnison de Pierregort vint escarmuchier les gens du conte d’Erby, et comment le conte de Kenfort29 fut delivré par eschange et autres.Aprés le conquest de la ville de Laille, et que le conte d’Erby y ot laissié gens d’armes et archiers depar lui, et envoyé XII bourgois de la ville en hostagerie pour plus grant seurté en la cité de Bourdeaux, il chevaucha oultre et vint devant Bonival. La ot grant assault et dur, et plusieurs hommes bleciés dedens et dehors. Finablement les Anglois le prindrent et le mistrent en mercy, et le refreschirent de gens d’armes et de cappitaines, et puis chevaucherent oultre et entrerent en la conté de Pierregort, et passerent devant Bourdille, mais point n’y assaillirent, car ils virent bien qu’ils eussent perdu leur paine. Si esploicterent tant qu’ils vindrent devant Pierregort. Par dedens estoient le conte de Pierregort et monseigneur Rogier de Kanfort, son oncle, et le sire de Duras et bien VIXX chevaliers et escuiers du païs, qui tous s’estoient la recuillis sur la fiance du fort lieu et aussi l’un pour l’autre. Quant le conte d’Erby et sa route parfurent venuz devant, ils aviserent et ymaginerent moult bien comment ne par quelle voye ils pourroient assaillir a leur avantaige. Si la virent forte durement, siques tout consideré ils n’orent mie conseil d’employer y leurs gens, mais se retrairent arriere sans faire assault et s’en vindrent logier a II lieues de la, sur une petite riviere, pour venir assaillir le chastel de Pellagrue. Ces gens d’armes qui estoient dedens Perregort parlerent ce soir ensemble pb 122 r (vol. 1)