pb 118 r (vol. 1)et le fist cappitaine et souverain de tous ceulx qui iroient avecques lui en ce voyage, et nomma les chevaliers qu’il vouloit qu’ilz feussent dessoubz lui et de sa charge. Premierement il y mist le conte de Pennebruth, le conte de Kenfort,29 le baron de Stanfort, monseigneur le conte de Manin, monseigneur Franke de Halle, monseigneur Jehan de Lisle, monseigneur Jehan de Grea, monseigneur Thomas Kok, le seigneur de Ferrieres, les deux freres de Lindehalle, le Lievre de Braban, monseigneur Hue de Hastigues, monseigneur Estiene de Tomby, le seigneur de Manne, monseigneur Richart de Hebedon, monseigneur Normant de Sinefroide, messire Robert d’Altem, monseigneur Jehan de Norvich, monseigneur Richart de Rocleve, monseigneur Robert de Quantonne, et plusieurs autres. Et furent bien troys cens chevaliers et escuiers, VIC hommes d’armes et IIM archiers. Et dist le roy d’Angleterre a son cousin le conte d’Erby qu’il preist asséz or et argent et le donnast et departeist largement aux chevaliers et escuiers "par quoy il peust avoir la grace et l’amour de eulz". Car on lui en delivreroit asséz. Encores ordonna il, ceste feste durant, monseigneur Thomas Daugourne pour aler en Bretaigne pardevers la contesse de Montfort, pour lui aidier et garder son païs, ja çoit que les treves y fussent, car il se doubtoit que le roy Phelippe n’y feist guerre, pour et sur les paroles qu’il lui avoit remandees par monseigneur Hervy de Leon. Pour tant il envoia le dit monseigneur Thomas a C hommes d’armes et CC archiers. Encores ordonna il monseigneur Guillaume de Montagut, conte de Sallebrin, a aler en la conté Dulnestre, car les Escocz s’estoient durement rebelléz contre lui, et avoient ars en Cornouaille bien avant et couru jusques a Brisco, et avoient assiegé la ville d’Ulnestre. Pour tant y envoia le roy le conte de Sallebrin a CCC hommes d’armes et VIC archiers bien appareilliéz.
SHF 1-206 sync Comment le conte d’Erby fut honnorablement receu des barons de Gascoingne pour le roy d’Engleterre, et comment il couroit devant la Bergerath.Ainsi que vous pouéz oir, departi le roy d’Angleterre ses gens, ceulx qui iroient en Gascoingne et ceulx qui iroient en Zelande ou Irlande, et fist delivrer par ses tressoriers a ses cappitaines asséz or et argent pour tenir leur estat et paier les compaignons de leurs gaiges. Ceulx se partirent ainsi que ordonné fu.
¶ Or parlerons premierement du conte d’Erby, car il ot la plus grant charge, et aussi les plus belles aventures d’armes. Quant toutes ses besoignes furent pourveues et ordonnees, et ses gens venuz et ses vaisseaulx frectéz et appareilliéz, il print congié du roy et s’en vint a Hantonne, ou toute sa navire estoit, et la monta en mer avecques la charge dessus ditte, et singlerent tant au vent et aux estoilles qu’ilz arriverent ou havre de Bayonne, une bonne cité et forte, seant sur la mer, qui tousdis s’est tenue englesche. La prindrent ilz terre et deschargerent leurs pourveances toutes le Ve jour de juing, l’an mil CCC XLIIII, et furent liement receuz et recuilliz des bourgois de Bayonne. Et y sejournerent et refreschirent eulx et leurs chevaulx VII jours. Au VIIIe jour le conte d’Erby et toutes ses gens se partirent, et chevaucherent vers Bourdeaulx, si firent tant qu’ilz y prindrent et alerent ceulx de Bourdeaux contre le dit conte a grant procession tant amoient ilz sa venue. Et fut adont le dit conte hebergié en l’abbaye de Saint Andry, pb 118 v (vol. 1)