pb 101 v (vol. 1)et prenoient chevaulx telz comme chascun les pouoit avoir et trouver, l’un a selle et l’autre sans selle, et alerent tant qu’ilz vindrent une nuit asséz préz de Roche Perion.

¶ Quant ilz furent la venuz, messire Gaultier de Mauni dist a ses compaingnons: "Certainement seigneurs, je yroie voulentiers assaillir ce fort chastel, se j’avoie compaignie, com travaillié que je sois, pour essaier se nous y pourrions riens conquester.". Les autres chevalliers respondirent tous: "Sire, aléz y tout hardiement, nous vous suiverons jusques a la mort.". Adoncques se mistrent tous a monter contremont la montaigne, tous prests et appareilliéz d’assaillir.

¶ A ce point estoit cel escuier que on appelloit Gerart de Maulain comme chastellain, comme vous avéz oy, lequel fist appartement armer toutes ses gens et aler aux guarittes et aux deffenses, et ne se mist point derriere, mais vint a toutes ses gens pour deffendre le chastel. La ot un fort assault dur et perilleux, et y ot plusieurs chevalliers et escuiers navréz, entre lesquelx messire Jehan le Bouteillier et messire Mahieu du Fresnay furent bleciéz, tant qu’il les convint rapporter aval et mettre gesir es prés avecques les autres navréz.

Cil Girart de Maulain avoit un frere, hardy escuier et conforté durement, que on clamoit Renier de Maulain, et estoit chastellain d’un autre petit fort appellé Favet, qui siet a moins d’une lieue pres de Roche Perion.

¶ Quant ce Renier entendi que Bretons et Anglois assailloient son fort, il fist armer de ses gens jusques a XL. Si yssi hors et chevaucha pardevers Roche Perion, pour adventurer et pour veoir se il pourroit en aucune maniere valoir a son frere ne aidier. Si lui advint si bien qu’il survint sur ces chevalliers et escuiers navréz et sur leurs mesgnie, qui gisoient dessoubz le chastel en un pré. Si leur coururent sus et pristrent les II chevalliers et escuiers navréz, et les fist apporter et admener pardevers Favet en prison, ainsi bleciéz qu’ilz estoient.

¶ Aucuns de leur mesgnie s’en fouirent ainsi bleciéz qu’ilz estoient, et messire Gautier de Mauny et les autres chevalliers, qui estoient grandement ententis d’assaillir, et leur dirent l’adventure comment on emmenoit ces chevalliers et escuiers devers Favet en prison, et comment ilz avoient esté pris.

¶ Quant les chevaliers entendirent ces nouvelles, ilz furent trop durement courrouciéz. Si firent cesser l’assault et se mirent a aler tant qu’ilz peurent, qui mieulx mieulx, devers Favet pour raconsuir ceulx qui emmenoient ces prisonniers. Mais ilz ne se porent tant haster que le dit Renier de Maulain ne feust rentréz en son chastel atout ses prisonniers, qu’ilz feussent venuz la.

¶ Quant ilz furent la venuz, l’un devant pb 102 r (vol. 1)