pb 88 vsçavoient pas ou c’estoit a aler de certain. Ainsi les souldoiers qu’il tenoit en Poitou, en Xanconge, en La Rochelle, en Bourdelois lui escripsoient que les François s’appareilloient durement pour guerroier; car les treves devoient faillir entre France et Angleterre qui avoient esté donnees a Arras au departement du siege de Tournay. Ainsi ot le roy bon mestier d’avoir bon advis et bon conseil. Car moult de guerres luy apparoient de tous léz. Si en respondit ausdiz messaigiers bien et a point et briefment vouloit, toutes choses mises jus, secourir et reconforter la contesse de Montfort. Dont pria il a son chier cousin messire Robert d’Artois, qu’il preist a sa voulenté des gens d’armes et des archiers et se partist et se meist en mer pour arriver en Bretaigne avecques la dicte contesse de Monfort. Le dit messire Robert si accorda voulentiers et s’appareilla le plus tost qu’il pot et fist sa charge de gens d’armes et d’archiers en s’en vint a la ville de Hantonne sur la mer. Et la furent ung grant temps ançois qu’ilz eussent vent a leur voulenté. Si se partirent environ Pasques, puis entrerent en leurs vaisseaux et monterent en mer. Donc avecques messire Robert d’Artois estoient de barons d’Angleterre, le conte de Sallebrin, le conte de Suffroch, le conte de Pennebruich, le conte de Kenfort, le baron de Stanfort, le seigneur Despensier et plusieurs autres.
¶ Or lairons ung petit a parler d’eulx et parlerons du roy anglois qui fist ung grant mandement parmy son royaume pour estre aux Pasques en la cité de Bervich ou païs de Northombrelande en entencion d’aler en Escoce et tout destruire le païs. Je vous diray par quel raison.
SHF 1-183 syncEn ce temps que les parlemens estoient a Londres des barons et des seigneurs d’Angleterre dessus diz et sur l’estat que vous avéz ouy, conseillierent les princes au roy en bonne foy, considerees les grosses besongnes qu’il avoit affaire, qu’il envoiast l’evesque de Lincolle pour accorder une treve ferme et estable, s’il pouoit, pour durer deux ans ou trois.
Le roy a ce conseil s’accorda moult envis. Et luy sembloit grant blasme de requerre son ennemi de treves selon ce que on lui avoit fait assavoir, mais le guerriroit si fortement que les diz Escocs seroient tous desirans de prendre treves. Mais les seigneurs d’Angleterre lui distrent que, sauve sa grace, que non estoit, selon que autresfoiz il avoit gasté tout et qu’il avoit affaire en tant de païs hors de son royaume. Et lui disoient que on tient a grant sens d’un seigneur quant il a plusieurs guerres en bon temps et il puet l’une atrever. Tant lui monstrerent de raisons qu’il si accorda et pria au prelat dessus dit qu’il y voulsist aler. L’evesque ne le voult mies esconduire, ains se mist au chemin et ala celle part mais il en perdi sa voie si qu’il revint arriere sans riens exploittier. Et rapporta au roy Edouart d’Angleterre que le roy David d’Escoce n’avoit mie son conseil de lui donner treves ne souffrance, ne aussi de faire aucune paix ou accord sans le gré et consentement et voulenté du roy Philippe de France. De ce rapport ot le roy Edouart pb 89 r