pb 82 rqu’il ne se partiroit de la jusques a tant qu’il sceulst quelles gens il eust ou chastel et comment il avoit esté perdu. Si s’appareillierent tous pour assaillir le dit chastel et monterent tous chargiéz contremont.

¶ Quant les Espaignolz qui dededens estoient, les virent en telle maniere venir, ilz se deffendirent comme ilz porent. Mais ceulx de dedens ne se tendinrent pas longuement. Car ceulx de dehors les assaillirent si forment et tindrent si prés de traire qu’ilz approuchierent les murs, malgré ceulx du chastel. Et trouverent le treu du mur par lequel ilz avoient le jour de devant gaignié le chastel. Si entrerent dedens par le treu meismes et tuerent tous les Espaignolz enmy la place, excepté dix que aucuns chevaliers pristrent a mercy. Puis se retrairent les Anglois et les Bretons pardevers Hanibout. Car ilz ne s’osoient grandement eslogner. Et laissierent le chastel de Conquest tout seul et sans garde, car ilz virent bien qu’il n’estoit mie a tenir.

Or revenray je a messire Loÿs d’Espaigne, qui fist logier son ost hastivement tout autour de Dignant et en Bretaigne. Et fist tantost faire petis bateaux et nacelles pour assaillir la ville de tous costéz par terre et par eaue. Quant les bourgois de la ville virent que leur ville n’estoit fermee que de palitz, ilz orent paour, grans et petis, de perdre corps et avoir. Si s’accorderent communement qu’ilz se rendroient saufs leurs corps et leurs vies et leur avoir, ce qu’ilz firent au quart jour qu’ilz furent venus la, malgré leur cappitaine et le tuerent enmy le marchié, pour tant qu’il ne si vouloit accorder.

¶ Quant le dit messire Loÿs d’Espaigne ot esté en la ville de Dignant par deux jours et il ot pris la feaulté des bourgois, il leur donna pour cappitaine celluy Girart. Gap: illegible Puis s’en ala a tout son ost devers une moult grosse ville sur la rive de la mer que on appelle Garlaide, si l’assega par terre, et trouva asséz pres grant foison de naves et de vaisseaux plains de vins que marchans y avoient amenéz de Poitou de La Rochelle, pour vendre. Si orent tantost vendu ces marchans, dont ilz furent mal paiéz. Et puis fist le dit messire Loÿs prendre toutes celles nacelles et naves et monter gens d’armes dedens avecques grant partie d’Espaignolz et de Gennevois. Et puis fist l’endemain assaillir la ville par terre et par mer, qui ne se pot longuement deffendre. Ains fut tantost gaignee par force et tantost mis a l’espee sans mercy hommes et femmes et enffans. Et V eglises arses et violees. Dont messire Loÿs fut durement courroucié. Si fist tantost pour ce pendre XXIIII de ceulx qui ce avoient fait. La fut gaingné grant tresor, si que chascun en ot tant qu’il en pot porter. Car la ville estoit grande, riche et marchande. Quant celle grosse ville qui Garlaide estoit apellee, fut ainsi gaingnee, robee et exillee, ilz ne sceurent plus avant aler pour piller gaigner. Si se mist le dit messire Loÿs en ces vaisseaulx qu’il avoit trouvéz en la compaignie de messire Oton Dorve et de Condons et d’aucuns Gennevois et Espaignolz pour aler aucune part pour s’aventurer sur la marine. Et le viconte de Rohen, l’evesque de Leon, messire Hervy, son nepveu, et tous les autres s’en revindrent en l’ost de messire Charles de Blois, qui encores seoit devant le chastel d’Aulroy ou quel siege ilz trouverent grant foison de chevaliers et seigneurs de France qui nouvellement estoient la venus, telz comme Loÿs de Poitiers, le conte de Valance et le conte d’Aucere, le conte de Porsien, le conte de Joigny, le conte de Boulongne, et plusieurs autres que le roy Phelippe y avoit envoiéz Gap: illegible pb 82 v