pb 6 rreconfort a messire Jehan de Haynault quant tout le monde luy failli. Et demoura a Valenciennes par l’espace de VIII jours deléz le bon conte et madame la contesse, Jehanne de Valois. Et entrementres fist elle appareillier son oeuvre et ses besoingnes et le dit messire Jehan de Haynault fist escripre lettres moult affectueusement aux chevaliers et aux compaignons de qui il se fioit le plus, en Haynault, en Brabant et en Hasbain, et leur prioit si a certes que il pouoit a chascun sur toute amistié qu’ilz venissent en ceste emprinse. Si en y ot grant planté, d’un paÿs et d’autre, qui y alerent pour l’amour de luy, et grant planté qu’ilz n’y alerent mie, combien qu’ilz en feussent priéz, et mesmement le dit messire Jehan de Haynault en fut durement reprins de son propre frere et d’aucuns de son propre conseil, pour ce qu’il leur sembloit que l’entreprinse estoit si haulte et si perillleuse selon les descors et les grandes haynes qui estoient adonc entre les barons et les communes d’Angleterre. Et selon ce que les Anglois sont communement envieux sur toutes gens estranges, quant ilz sont a leur dessus, especialment quant ilz sont en leur paÿs, que chascun avoit paour et doubtance que le dit messire Jehan de Haynault ne nul de ses compaignons peust jamais revenir. Mais quoy que on luy blasmast ne desconseillast, le gentil chevalier ne s’en volt oncques delaier. Ançois dist que il n’avoit que une mort a souffrir qui estoit en la voulenté de Nostre Seigneur. Mais il avoit promis a celle gentille dame la conduire jusques en son royaume, si ne luy en fauldroit pour pourir et aussi chier avoit il a prendre la mort avecques une noble dame qui dechaciee et deboutee estoit hors de son paÿs, se mourir y devoit comme autre part, car tous chevaliers doivent aidier a leur loyal pouoir toutes dames et pucelles dechacees et desconfortees a leur besoing, mesmement quant ilz en sont requis.
Comment messire Jehan de Haynault print congié de son frere le conte de Haynault pour remener la royne et son filz en Angleterre.Ainsi estoit meu et encouragié messire Jehan de Haynault et faisoit semonse des Hannuyers a estre a Halle et les Braibançons a estre a Bredas et les Brehaignons a estre ou Mont Sainte Gertrux et les Hollandois il en y ot aulcuns a estre a Dourdrech.
¶ Lors print congié la royne d’Angleterre au conte de Haynault et a la contesse et les remercia grandement et doulcement de l’onneur de la feste et bonne chiere et belle recueillie qu’ilz luy avoient faitte et la baisa au partir le conte et la contesse et leurs beaux enffans. SHF 1A-11 sync Ainsi se parti la dame et son filz et toute leur route acompaigniéz de messire Jehan de Haynault, qui a grant dueil et moult envis avoit eu congié de monseigneur son frere, quoyqu’il feust des premiers accordéz et consenty a ce voiage. Mais finablement luy donna de bonne voulenté et luy dist ainsi messire Jehan, par trop beau langaige : "Monseigneur, je suy jeune et encouragié de ce faire, si croy que Dieu me ait pourveu de ceste emprinse pour mon avancement, et se Dieu meist le courage, me dit trop bien que nous en vendrons a nostre dessus. Car je cuide et croy que par pechié a tort et sans cause et par envie on a ceste bonne royne enchaciee et son filz hors d’Angleterre. Si est aumosne et gloire a Dieu et au monde de adrecier et renconforter les desconfortéz et desconseilliéz et especialment si haulte et si noble dame comme ceste cy est, qui fut fille de roy et est descendue de royalle lignee et sommes de son sang et elle du nostre. Ja auroie plus chier a renoncier a tout ce que j’ay vaillant et aler servir Dieu Oultre Mer sans jamais retourner que la bonne dame pb 6 v