pb 66 rfille au roy de France, avecques le roy d’Angleterre.

¶ Ceste chose ne vouldrent mie les Anglois faire ne accorder ne aussi accepter, ains se departirent ces seigneurs de costé et d’autre de ce parlement, sans riens faire ne exploittier, fors tant seulement que les treves qui avoient esté prises entre les deux roys devant Tournay furent eslongnees a deux ans ensuivans, et fut tout ce que les cardinaulx, que le pappe Clement VIe avoient envoiéz en legacion, y porent faire ne empetrer. Et puis aprés s’en rala chascun des diz seigneurs en son lieu et en sa contree et les cardinaulx revindrent et passerent parmy le païs de Haynault, honnorablement et grandement. Ilz furent receuz et festiéz du conte de Haynault, de madame la contesse et des seigneurs du païs en la bonne ville de Valenciennes.

¶ Or nous deporterons de parler de la matiere des deux roys, tant comme les treves dureront qui furent asséz bien tenues, excepté les marches loingtaines, et entrerons en la grant matiere et histoire de Bretaigne, qui grandement enlumine ce livre pour les beaux fais d’armes et belles adventures qui y sont advenues et ramenteues, si comme vous pourrés ensuivant oir et entendre. Et pour ce que vous sachiéz veritablement le commencement et la racine de ceste guerre et dont elle s’esmut, je vous diray et escheveray de point en point. Si en dirés vostre entente et quelle cause et droit messire Charles de Blois ot ou grant heritaige de Bretaigne. Et d’autre part le conte de Montfort qui en fist fait contre luy, dont tant de batailles et de grans faiz d’armes sont advenues en la duchié de Bretaigne et es marches voisines.

Assavoir est que quant les treves furent accordees et seellees devant la cité de Tournay, tous les seigneurs et toutes manieres de gens se deslogierent d’un costé et d’autre. Et s’en ala chascun en sa contree. Le duc de Bretaigne, qui a ost avoit esté avecques le roy de France devant Tournay plus grandement que nul des autres princes, s’en retourna en son païs en entente de retourner. Mais il ne pot, car une maladie sur le chemin le prist dont il le convint mourir, dont ce fui grant domaige car grans guerres et destructions de villes et de chasteaux en advindrent, puis entre les nobles et non nobles de son païs. Et pour mieulx chascun informer et aprendre pourquoy tous ces maulx advindrent, je en compteray aulcune chose partie ainsi que je sçay et que j’en ay enquis mesmement ou paÿs ou j’ai esté et conversé qui ont esté ou je n’ay mie esté et qui ont veü ce que je n’ay mie veü ne peu veoir.

¶ Ce duc de Bretaigne, quant il trespassa de ce siecle, n’avoit nulz enffans pb 66 v