pb 12 rselon son estat au mieulx qu’il pot. Quant on eust tout appareillié, le roy et tous barons se trairent hors et alerent logier a VI lieues de la dicte cité. Et messire Jehan et sa compaignie furent logiéz au plus pres du roy, pour honneur et pour tant aussi que on ne vouloit mie que les archiers qui tant les haioient, eussent aucun avantaige sur eulx.
¶ Si sejournerent le roy et ses premieres routes II jours pour attendre les derrenieres pour mieulx pourveoir chascun s’ilz leurs failloit riens. Au tiers jour aprés l’ost qui estoit la, se desloga et se traist avant de jour en jour, tant que on vint oultre la cité de Durem, une grande journee du paÿs que on appelle Northombrelande, qui est sauvaige et divers paÿs, plain de desers et de grandes montaignes et durement povre de toutes choses fors que de bestes, et cuert parmy une riviere plaine de cailloux et de grosses pierres, que on nomme Thin. Sur celle riviere siet amont la ville et le chastel que on appelle Carduel en Galles, qui fut jadiz au roy Artus et ou il tenoit moult voulentiers, et aval est la bonne ville que on appelle Neufchastel sur Thin. La estoit le mareschal d’Angleterre atout grans gens d’armes pour garder le païs contre les Escocs qui gisoient aux champs pour entrer en Angleterre. Et a Carduel gisoient aussi grant foison de Gallois, dont le conte de Herfort, le sire de Montbray estoient conduiseurs et gouverneurs pour deffendre la passaige de la riviere. Car les Escocs ne pouoient entrer en Angleterre sans passer oultre la ditte riviere. Et ne pouoient sçavoir les Anglois certainement nouvelle des Escocs jusques ad ce qu’ilz vindrent a l’entree de celluy paÿs. Mais adoncques porent apparanment veoir et appercevoir les fumees des hameaulx que ilz ardoient en celluy paÿs, et avoient passee celle riviere si tres paisiblement que oncques ceulx de Carduel ne ceulx de Neufchastel sur Thin ne sceurent riens de ce. Car entre Carduel et Neufchastel puet on bien veoir et avoir environ XXIIII lieues anglesches. Mais pour mieulx sçavoir la maniere des Escocs, je me tairay ung petit des Anglois et diray aucune chose des Escocs et comment ilz sceuent guerroier.
SHF 1-28 sync La maniere des Escocs et du maintieng quant ilz sont en guerre, et l’ordonnance des Anglois qui se cuidoient combatre a eulx.Les Escocs sont durs et hardis et fort travillans en armes et en guerres et en ce temps la ilz amoient et prisoient asséz pou les Anglois et encores font ilz a present. Et quant ilz veullent entrer ou royaume d’Angleterre, ilz mainnent leur ost bien XX ou XXIIII lieues loing que de jour que de nuit, de quoy moult de gens se pourroient esmervueillier, qui ne sçavroient leur coustume.
¶ Certain est que quant ilz veullent entrer en Angleterre, ilz sont tous a cheval, les ungs et les autres, excepté la ribaudaille qui suyt a pié. C’est assavoir les chevaliers et les escuiers, bien montéz sur bons gros ronssins et les autres communes gens du paÿs sur petites haguenees, et ne mainent point de charroy pour les diverses montaignes qu’ilz on a passer parmy ce paÿs dessus dit que on appelle Northombrelande. Et si ne mainent nulles pourveances de pain ne de vin, car leur usaige est tel en guerre et leur sobrieté que ilz se passent asséz bien longuement de char cuite a moitié sans pain. Et si n’ont que faire de chaudieres ne de chauderons, car ilz cuisent bien leurs chars en cuirs de bestes, mesmement quant ilz les ont escorchees, et si sceuent bien qu’ilz trouveront bestes grant pb 12 v