The Hartlib Papers

Monsieur

J'ay veu par les vostres le peu de succez que m'a rapporté le voyage du sieur Bodin; Ie n'eusse iamays creu que la recommandation de tant de personnes signalées qui en auoyent escript en ma faueur, voiré conseillé et trouué bon ledict voyage eust eu si peu de credit, I'attribue auec vous la cause d'vn tel mal a l'accident infortuné suruenu entre ces Seigneurs, Mais i'adiouste de surcroist l'absence de Monsieur Ambstruder, lequel estant present eust daigné faire entendre de ma part au Roy de la Grand Bretaigne, quelles estoient et sont encores mes intentions enuers le Royaume et Potentats d'Iceluy pour le bien publicq et vnion des Eglises Euangeliques; M'asseurant qu'en estant bien informé par quelque personnage de credit, il n'eust renuoyé mon secretaire sans expedition fauorable, veu l'jnterest qu'il a en la cause que nous poursuiuons, et la necessité qu'elle soit maniée par personnes douées d'entendement et experience, Mais puisque la pierre est iettée pour ce coup, il conuient regarder aux moyens de la mener a chef d'oeuure, et trouuer quelqu'vn qui face entendre dignement au Roy quelles sont les qualites des ouuriers qui s'y employent, Que sy vous n'auez l'oreille du Roy assez fauorable pour y paruenir de vous mesme, Il vous plaira employer a cet effect ou Monseigneur l'Archeuesque de Canterburry vostre bon patron et promoteur, ou tel autre que iugerez propre et idoine de s'en entremettre, affin que sachant la response de sa Majesté, et les personnages qui s'en seront entremis ie puisse me resouldre pour l'aduenir de ce qu'il me conuiendra faire, I'attendray donc de vos nouuelles sur tout ce que dessus auant le iour que doit commencer la diette de francfort, pour selon icelles me pouuoir disposer et resoudre de ce que Ie deuray faire ou dire y estant; [comme?] aussy en quels termes i'en deuray tenir propos aux Altesses de Messeigneurs les Electeurs de Saxe, de Brandbourg; Landgraue de Hesse, et autres Seigneurs de l'vnion auec lesquels il me faudra auoir des conferences pour d'autres affaires importantes; Cependant ie vous remercye prouisionnellement de touttes les assistances que mondit secretaire a receu de vous, et de la faueur que luy auez faict receuoir de Monsieur le Cheualier Roe lequel ie vous supplye saluer de ma part, luy tesmoigner les ressentiments condignes que I'en ay, et luy faire offre de mon treshumble seruice, en attendant que l'occasion se presentera fauorable pour m'en monstrer reconnoissant; Ie vous prie de croire que Ie tiendray la main a ce que Monsieur Dorcheus s'acquitte de ses promesses, et ce en telle sorte que reconnoistrez que le desastre de question ne prejudiciera en rien a nos meilleures intentions pour le repos publicq et sur cette ferme asseurance que Ie vous prie auoir en moy, Ie ne la feray plus longue que pour vous supplier vouloir prendre la peine de faire deliurer les encloses selon leurs addresses, maintenir tousiours mon party enuers tous et contre tous aux occurrences qui s'en presenteront, et croire que Ie seray a tousiours de nom et d'effect

De Strasbourg ce

30^e Ianuier 1634

   stil. vet.

                Monsieur     Vostre

                [Glaser?:] treshumble & tres =

                           = affectionné seruiteur

                                 J Glaser

                                   [flourish? ia?]

Monsieur

Monsieur Dure

fidele Ministre de St [Evangile?] [flourish?]

         A Londres

          1634

       Glaser

Scr. Strasb. ---------- 30 Ian

Acc. Lond   ----------- 19 Martij