The Hartlib Papers

Monsieur et treshonoré frere en Christ

Vostre lettre du 9/19 a fridberg me fut enuoiee hier apres midy par Monsieur Toussain, peu de temps apres Ie l'ay leu a Monsieur Rouier qui vous escrit et enuoie les deux encloses, et moy a Monsieur Pastor qui est comme Ie crois Vicechancelier du Duc des deux ponts, lequel est l'vn des plus Religieux Princes que le soleil couure en terre, si par occasion Monseigneur son frere lequel a espousé la soeur de Madame Douairiere de ce lieu, estoit aussi la, parles luy hardiment, Il est Prince aussi plein de pieté et debonnaireté, et si n'aues autre suiet d'acces, presentes luy de ma part, mes tres humbles seruices, Ie luy doibs response a des lettres et quelques papiers qu'Il m'ha enuoié et le dernier par Monsieur Pastor, ausquels Ie respondray aussi tost que Ie scauray ou Il est, et opportunité me sera offerte de luy escrire, Ie m'asseure que tous deux fauoriseront la bonne oeuure a laquelle vous vous emploies, et Ie prie fort Monsieur Pastor de vous y aider aussi pleust a Dieu qui I'eusse autre suiet et pouuoir de vous tesmoigner l'affection qu'en mon coeur Ie vous porte, les efforts seroient plus eloquens que ma plume, et prie Dieu de m'en faire la grace. Vous me feres plaisir de m'aduiser du temps auquel sortires de francfort, car si Ie pouuois Ie vous irois veoir encores vne fois, Ie [sors?] de sepmaine demain matin, mais mardy et mecredy nous auons la feste de la naissance de nostre Redemption, si esties la encores Ieudy, et que I'aie commodité Ie vous iray embrasser. Ie ne scay si Messeigneurs les Comtes se sont bien accordés a fridberg pour les affaires generales, et crains fort, qu'a Dresde ce ne soit de mesme I'auois sceu que Monseigneur auoit esté choisi pour Directeur, et ne m'en suis esiouy considerant sa Ieunesse, et la triste saison en laquelle nous viuotons, I'espere que Dieu y pourueoira, et vous conseruera et benira Ie l'en supplie du meilleur de mon ame, et ainsi demeure    Monsieur

              Vostre tres affectionné frere et

               cordial seruiteur et ami. Du Boys./

De hanau le 22 Xbre 1632 / 1 Ianu 1633

A Monsieur

Monsieur Duré &c.

Ches Monsieur Herff.

demeurant en la Bendergassen

             A francfort

       1632

 [M? altered] du Boys

Scr. Han. -------- 22

                      Xbris

Acc. Francfort ---- 22