The Hartlib Papers

Monsieur et treshonoré frere,      Vostre lettre du 10/20 m'ha esté rendue le iour suiuant a 8 du soir, et. enuoiay a l'instant a Monsieur Toussanus celle que luy escriuies, et priay hier Monsieur Rouier de luy demander, si ses lettres pour Angleterre estoient prestes, mais ie ne le trouua a present luy aiant signiffié par vn billet s'Il vous vouloit respondre, Il m'escrit l'auoir fait ce matin aiant adressé sa lettre au Sr fitzen. Nous auons esté assemblés apres nos actions du matin, et auons iuge expedient d'adiouster ce post scriptum que verrés en la copie[altered] de la main de Monsieur Rouier, n'aiant eu loisir de le faire pour estre en sepmaine, ioint qu'outre le trauail qui commence a m'estre plus pesant qu'en la verdeur de mon age, Ie suis tellement attristé de ces deux Princes que Dieu nous a osté, qu'a peine Ie peux mediter, ny escrire. Il est certain que Dieu fera son oeuure, par, sans ou contre moiens selon que bon luy semblera, mais est a craindre que ce ne soient precurseurs de son courux attiré et attisé iournellement, griefuement par nos pechés, si faut il se contenter des choses presentes, car Il a dit, Je ne te delaisseray ny ne t'abandonneray / vous m'eussies fait et feries plaisir de me faire part de ce que Monsieur forbesius a oui de la bouche de ce braue Roy d'heureuse et celebre memoire et luy m'eust fauorisé plus que peut estre il ne pouroit croire de me faire l'honneur de me visiter, ou m'aduiser de son arriuee en ce lieu, ou celui qui vous rendra ce pacquet a eu plus de bien que moy de le veoir, et si vous et luy esties encores lundy a francfort Ie ne manqueray a mon debuoir, si faire ne se peut, I'espere que selon vostre promesse et amitié de laquelle Ie fais estat, vous me declareres la resolution[altered] finale de vostre intention. l'attendant Ie vous salue cordialement et Monsieur forbesius, priant Dieu de vous conseruer et benir en vos desseins, et voiages, voire en eternité, et vous, d'aimer, tousiours

   Monsieur

             Vostre tres affectionné frere, seruiteur

              et entier ami.      Du Boys./.

De hanau le 21 9bre/1 Xbre 1632/

A Monsieur

Monsieur Duré fidele Ministre

de Iesus Christ, estant a present

                   A francfort.

    1632

     Mr du Boys

Scr. Han.   21 9br/1. Xbre

Ac. Francf. 22. 9br/2 Xbre