| Title: | Copy Letter, Johannes Diodatus To Dury, In Latin |
|---|---|
| Dating: | 28 August 1633 |
| Ref: | 59/10/149A-150B |
| Notes: | For recipient see 59/10/1. |
[59/10/149A]
[right margin, another hand : Diodati]
26
S. in Domino frater dilectissime.
[right margin: NB] Binas intra sesquiannum à te accepi, Vir Reverende: ad priores anno præterito respondi, et responsum meum direxi Francofurtum ad Dominum Curtium, qui tum in Comitatu Legati Anglici agebat in illis oris. Ad posteriores citius respondissem, si per valetudinem, quâ adversissimâ sum ab arthritide fermè per totam hanc æstatem conflictatus licuisset. jam relevatus narro tibi accidisse nobis nuncium suspiratum istius conciliationis, ut alterum quoddam divinum pacis Evangelium. Sustulimus illico ora, et corda ad Dominum pacis spectaturi num tantarum cladium præteritarum hanc vellet fructum suavissimum à reliquiis seminis benedicti legi, ut omnes in sanctam Concordiam citra anxias disputationes, sævas factiones, pudendas distractiones, tolendam lacerationem, et hostium consiliis et insidiis maximè, et unicè opportunam coalescere in Domino possemus: ambulantes
[59/10/149B]
in eodem canone in iis ad quæ utrique jam pervenimus: patienter, et modestè ferentes diversimodè sentienties, dum DEUS ipsis etiam revelaverit. Tibi nuncio, et tanti boni procuratori, et pacis publicæ, et gratiæ sequestro, omnem benedictionem, [left margin: NB] et retributionem à DEO, cujus opus tam sedulò, et cordatè agis, comprecati. Scopum probamus, laudamus, optamus omni studio, omni ope. De Mediis variæ fuerunt sententiæ: tandem convenimus in hanc communem: de illis non esse in antecessum pluribus agendum, ne Insidiator Diabolus [left margin: NB] ad hoc limen allidat omne Negotium: ne umbratici, et scholastici homines, pessima ad rem tantam instrumenta, in istis præconsultationibus, suo more exacuant, et exerceant ingenij sui acumen contradictionibus inanibus: satius videri simul rem aggredi, et in arenâ consilia prudentiæ expedire. At verò non consultum judicamus nos in mundo tenues sollicitare maximum, et sapientissimum Regem vestrum,
[59/10/150A]
cui à proprio zelo, et prudentiâ, et à monitionibus præstantissimorum suorum Theologorum satis est argumentorum ad opus hoc impellendum: præter causas necessitudinum privatas. Sed nec judicamus temporis momenta in præsenti satis opportuna: strepente, et concussâ armis ad huc nutantibus Germaniâ: nullo capite æquo eminente: nostrorum partibus adhuc afflictioribus, quàm ut sperari possit à Lutheranis florentioribus, et jam plus æquo ferocientibus in leges pacis æquas admittendos. Quorum prius esse animos molliendos, [right margin: NB] prudenter captandos, et ad amorem tam diu exulantis Concordiæ blandè demulcendos. Momentum occasionis ubi Deus aperuerit, illico sine morâ accipiendum. Vos quæ in mediâ acie statis, monete nos occasionum, utimini operâ omni nostra, persuasissimi estote nos ad promovendum tantum opus, neque labore, neque studio, neque sudoribus, neque patientiâ, et moderatione cuiquam cessuros. Benedicat
[59/10/150B]
tibi Angelo [pacis? altered] Dominus copiosè; et sanctissiumum zelum tuum gloriâ finis adepti coronet. Vale in Domino frater dilectissime, et pretiosissimo pignore quæsitæ pacis conjunctisse.
Genevæ 28 Aug. 1633.
Tui studiosissimus
Ioh. Diodatus.