| Title: | Copy Letter, Reformed Ministers Of Paris To John Dury, In Latin |
|---|---|
| Dating: | 8 April 1633 |
| Ref: | 59/10/122A-123B |
[59/10/122A]
19
Exemplum Epistolæ Ministrorum
Ecclesiæ Reformatæ paris. inscriptæ
Reverendo, Clarissimoque Viro Domino, ac Fratri in
Christo observandissimo Iohanni Duræo; Ecclesiæ
Reformatæ, quæ est Elbingæ in prussiâ
pastori fidelissimo.
[59/10/122B]
Reverende Vir, ac Conserve in Domino observandissime:
Quas tu ad nos Heilbrunnæ 22 April. dedisti literas, eæ dici non potest, quàm acceptæ, jucundæque nobis fuerint. DEUS qui id tibi animi inspiravit, tam strenuè in Christi sui causâ laboranti adesse, [left margin: NB] cæptaque secundare velit. Utinam et nobis communem tecum in sanctissimo Negotio operam navare liceret! Sed quod optimè, sanctissimèque conjectat Tua Reverentia, is est Ecclesiæ nostræ status, qui vota tantum et animos consociare concedit; [left margin: NB] non etiam cætera præstare quæ à nostrâ tenuitate in tantâ causâ exigi, et fortasse etiam aliquatenus exspectari possent.
Fecimus certè quod licuit: Domino, Authori totius operis benediximus; quæ sit nostra, quæ nostrarum universim Ecclesiarum sententia, quoad fieri potuit,
[59/10/123A]
explicavimus scripto quodam seorsim hac de re instituto, quod Reverentiæ Tuæ, prout res tulerit, utendum, et cum dilectissimis utrarumvis partium fratribus communicandum mittimus. Ex quo cum intellexeris quo loco, ac numero sanctum hoc Christi Negotium, omnesque qui in eo desudant, fratres habeamus, non dubitabis, quin te præ cæteris peculiari quodam amore, atque honore prosequamuur, qui singulari divini domus zelo percitus, princeps exsurgis, Christique nostri legiones fædâ discordiâ, turpibusque odiis divisas, ac disjectas, sublato communis Imperatoris vexillo, in eadem castra revocas. Te verò Reverende frater, pro isto egregio, planèque heroico facinore omnibus affatim bonis locupletet; plurimosque toto passim Israële viros suscitet, qui te præeuntem
[59/10/123B]
æquis passibus sequantur, tantâque fide, ac constantiâ in hoc, quod tu moliris, opere versentur, ut florentem brevi in Ecclesiâ pacem, ac Concordiam videre, illudque divini [vatis?] alacres concinere queamus, Ecce quàm bonum, et quàm jucundum habitare fratres in unum. [Greek: genoito, genoito]. Vale Reverende Vir, ac frater in Christo suavissimè. Dat. Lutet. paris.
8 April. Anno 1633.
Rev. T.
studiosissimi in Christo servi, ac fratres
Iohannes Mestrezatus}
Carolus Drelincourt } Ecclesiæ Reform.
Edmundus Aubertinus } paris. pastores.
Iohannes Dalleus }