| Title: | Copy Petition In Scribal Hand D, Ludovicus Gustavus To Cromwell |
|---|---|
| Dating: | undated |
| Ref: | 54/61A-62B: 62B BLANK |
| Notes: | Draft at 54/59. |
[54/61A]
SERENISSIME ATQUE CELISSIME PRINCEPS
PROTECTOR POTENTISSIME
Per eminentem Celsitudinis Tuæ, super reliqvos Europæ Principes, Pietatem et Zelum, firmam capio spem, fore ut Celsitudinis Tuæ animum ad beneficentiam flectere qveant humillimæ ejus preces, qvem Misericors Deus dignatus est dono sinceri & ferventis desiderij, ut Talentum suum, ad ipsius Gloriam, & oppressi Populi sui solatium, corumque retributionem redundare qveat; qvi se jam dudùm, ut et qvotidiè adhuc fit, inebriarunt sangvine Sanctorum Martyrum. Hoc incitamento pulsus audacter iter huc facere, & humillima ac fidelissima servitia mea Celsitudini Tuæ offerre volui: agnoscens veneransque sublimia illa dona, qvæ Deus Ter Optim: Maxim: eum in finem Celsitudinis Tuæ contulit, ut condignum se Instrumentum ad gloriæ Suæ manifestationem præberet. Eamque ob rationem, grata Cels: Tuæ illa servitia fore, qvæ Ipsi hoc tempore ab acerrimè persecuto, observantissimè offeruntur, qvo in auribus suis, sonum Divinæ illius buccinæ, Cels: Tua jam audiat, qvæ Illam ad vindicandas Injurias, Tyrannides, imò plùs qvàm Barbaricas Actiones, in Sanctum Dei Populum exercitas, & ad liberandum illum à gravi oppressione illorum, qvi Veritatem sub iniqvitate & injustitiâ detinent, pessimisque Consilijs & Machinationibus suis, qvæ damnabili, horrendoque Religionis eorum fundamento necessariò fluunt, Protestanti Religioni, et exindè veræ Pietati, Justitiæ & Sanctitati insidias struunt & totalem minantur ruinam, potenter excitat. Qvòd si inter illos, Familiam numerarem meam, qvæ bonam ob causam aliqvid passa est; An absque ratione illud facerem, Cels: Tuæ judicium subire haud vereor. Non autem antiqva illa memorabo, Familiam meam, dimidiam partem Circuli Franconici in Germaniâ olim possedisse. Qvia verò hic Tractus, unus ex amoenissimis & fertilissimis est totius Germaniæ, Sacerdotibus, Episcopisque Papisticis, plurimùm arrisit. Et cùm in medijs Papatûs tenebris, Antecessores mei constituti, & cæcâ obedientiâ Papæ suisque aseclis obstricti essent, dicti Episcopi.etc. metu Purgatorij, spe liberalissimarum indulgentiarum, & alijs infinitis astutijs diabolicis, Conscientias Antecessorum meorum obligarunt, ut magnam partem Bonorum, vel vivi, vel Testamentis, Ipsis cederent, relictis in [catchword: remune-]
[54/61B]
remunerationem Antecessoribus meis, solis schedulis Indulgentiarum, usque ad mille annos, imò ad infinita tempora. Nec minus damnum, Familia mea perpessa, in prodigiosâ & invalidâ illâ donatione maximæ partis Italiæ, ab Imperatore qvodam Austriaco, Papæ factâ, per qvam Familia mea magnas has duas Provincias Romaniam & Romaniolam perdidit, Antecessoresque mei à Papâ ejecti fuerunt. Maximum demùm damnum Familia mea Paterna experta est, post belli Bohemici initium, ubi unus ex agnatis meis, persecutorum partes sub defuncto Rege Bohemiæ, Comite Palatino tenens, Austriacam Domum ita offendit, ut Arces nostras Residentiales, tanqvàm Exercitui suo proximas, incendio, & Terras nostras totali ruinæ dare jusserit, crudeliter & contrà Privilegia nostra, Iuramentaque ab ipso facta; ita ut multis annis dilectissima ater mea, post obitum Patris, cùm 12. impuberibus Infantibus, miserabiliter in Exilio degere, coacta fuit. Cùm verò devastatas & depopulatas Terras nostras recuperavimus, Domus Austriaca Familiam meam semper oppressam tenere intendens, nuperrimè per horrendorum Idolorum ex Ecclesijs nostris ejectionem, irritata, continuis injustissimis Processibus, Cognatos nostros, propter Religionem nobis infensissimos fovendo, totali nos consecrare conatur ruinæ.
Cùm itaque ad proseqvendam fortassis non illaudabilem intentionem meam <aliquid> pro liberatione oppressorum, in commune conferendi, à Domo Austriacâ nervi mihi abscissi sint, Celsitudinis Tuæ eximia Pietas, & charitativa inclinatio, pro ejusmodi persecutis, certò mihi persvadit, fore ut Celsitudo Tua conatus meos, omni auxilio libenter promoveat, & offerta fidelissima servitia grata habeat. Qvòd verò hactenùs importunitatem omnem procùl habui, causam præbuit Matrimonij propositum Consilium, ex plurimorum prudentum Amicorum meorum hortatu initum, qvo ipso spem hanc fovi, fore si benè res succedant, media mihi suppeditatum iri, qvibus propositum meum, absque Celsitudinis Tuæ molestiâ, pro viribus promovere, & ad accepta ipsa servitia, fidelissimo animo præstanda, aptum me reddere potuissem. Cùm verò res malitiâ nonnullorum, in feliciter successerit, necessitate coactus sum, denuò Celsitudini Tuæ importunum me reddere, præsertim in his turbis ac perplexitatibus meis, qvæ molesto [catchword: arresto]
[54/62A]
arresto, cui Hospes meus, contrà promissi sui tenorem, & anteqvàm bonis verbis cautionem unqvàm à me petierit, me nuper qvàm injustissimè addixit, causatæ sunt. Idcircò, cùm infortunium hoc, non culpâ meâ, sed favorabili ex causâ, nempè, qvòd ingenuo qvodam ac syncero zelo, Celsitudini Tuæ in dicto glorioso opere, fidelissima servitia offerre voluerim, eâ de causâ, hanc in Regionem venerim, ac hucusque me in hoc loco detinuerim, mihi accidat; Confidenter Celsitudinem Tuam humillimâ meâ supplicatione adire volui, ut prædictis ex considerationibus, ad auxiliarem & charitativam suam opem, commemoratâ ex necessitate, & nonnullis alijs debitis, me liberandi, & qvàm clementissimè, ad antedicti propositi mei proseqvutionem, media suppeditandi, se commovere patiatur. Qvod auxilium, qvò citiùs Cels: Tua in extremâ meâ necessitate, mihi succurrere dignabitur, eo majorem gloriam & retributionem à Deo Cels: Tua qvàm certissimè recipiet. Ego verò Celsitudini Tuæ totum meum posse, & obseqvia in servitijs dedico: nullus dubitans, qvin Omnipotens Deus Spiritu fortitudinis Suæ me roboraturus sit, ut Cels: Tuæ grato cùm effectu, servitia fidelissima præstare possem. Celsitudini Tuæ itaque clementissimam dispositionem de me humillimè relinqvens, sum toto ex animo
Celsitudinis Tuæ
humillimâ cum observantiâ
& singulari studio
addictissimus Servus