Title: | Copy Manifest In Scribal Hand C, From Sadowsky?, In Latin |
---|---|
Dating: | undated [C.1654?] |
Ref: | 46/10/4A-5B: 5B BLANK |
[46/10/4A]
Formula Manifesti, quô expeditionis
Bellicæ præsentis, causæ erunt reddendæ.
----------------------------------------------------------------
Omnibus Regni Bohemiæ, et Incorporatarum Provinciarum Incolis, Baronibus, Egvitibus, Civibus, Ruricolis, cæterisque Ordinis Politici Summis et Imis, Nos Amici vestri ad liberandum vos è servitutis Iugo divinitùs electi et vocati, salutem, dilectionem, favorem, et officia nostra defferentes,
SIgnificamus Universis et singulis, Bellum præsens, inopinatum fortè vobis, in Sacrosancto Dei nomine suscipi, non cuiqvam nocendi Animô, præter solos illos, qvi nocent omnibus, publicæ Pacis, Politicæ et Religiosa, per omnia Mundi Regna turbatoribus perpetuis. Qvi ut manifesti Iurium Divinorum et humanorum violatores, sub Religionis Titulo exsecrandam Idolatriam non exercent tantùm ipsi sed et locô veri Dei cultûs introducunt ubique: usurpantes insuper licentiosè supra Reges, Principes, omnesque Dominatus, potestatem, et in Conscientias hominum dominandi libidinem. Nihil pensi habentes, qvòd Deus Deorum Idololatriâ severè prohibitâ, sui unius cultum in spiritu et veritate mandavit; Majestates verò eminere, et illis omnem Animam subjectam esse, jussit; Viros denique Ecclesiasticos meditandæ atque docendæ Legi suæ vacare, non autem mundanè dominari, ordinavit. Hi autem derelictis fontibus Isròelis, purô DEI Verbô ad humanarum traditionum lacunas, homines non abducunt solummodo, sed compellunt; abominationibus Babylonicis Gentes et Populos inebriantes, et ut de Calice iræ Dei bibant, cogentes: qvemadmodùm totus Christianus Orbis experitur, imprimis autem nos in Gente nostrâ, tertiô jam seculô. Qvanta enim in Sanctos Majores nostros, ab adamatum puriorem DEI cultum, exercuerint odia; qvantasque apud Imperatores, Reges, Principes, Nationes, Veritatis Divinæ doctores captivârint, et exusserint; qvantis denique bellis (concitatis in perniciem Gentis nostræ Europæis populis) eos afflixerint, et delere qvæsierint, historiæ loqvuntur. Cumque propitius tunc
[46/10/4B]
fideli Populo suo Deus machinationes istorum perpetuò disijceret; nos autem nuper à majorum pietate degeneres, divinam castigationem mereremur, tradidissetque nos in manus corum tanqvàm flagellorum suorum, Deus: illi collectâ plus qvàm Ægyptiacâ immanitate, omnes Patriæ columnas, partim crudeli morte et martyriô, partim in calamitosum Exsilium disjectione, partim dementationibus, et violento ad Veritatem Evangelij deferendum compulsu, subruerunt: omnesque omnibus libertatibus, Corporis et Animæ, exuerent extremæque servitutis jugum omnibus inijecerunt, ita nobis, et in nobis Christo, cum Evangelio suo Gentibus in ludibrium expositis. Neque hîc finis: sed extollentes se supra omne qvod dicitur DEUS aut numen, non veriti sunt barbaris suis deformationibus, Babylonicas suas abominationes, vi gladij et Carcerum, varijsque exqvisitis torturæ generibus, propagare: cogentes vosmet ipsos adorando ea qvæ non sunt Deus, vestris et vestrorum subditorum Conscientijs inferre.
Tum verò occupatis per omnia Tribunalia, Cancellarias, Curias, primis sedibus, Iura Politica, pro sua libidine formant ac reformant, injurijsque ac violentijs omnia implent: plerique illorum nihil nisi impuri sodomitæ, spuriorum suorum aut promotores aut interfectores. Sacerdotes verò omes promiscuè sacrilegi Animarum Nundinatores, pauperum afflictores, verique sangvisuga, sine omni Christiano sensu aut condolentiâ, inexplebili avaritiæ ac libidini suæ litantes.
Qvemadmodium ergò alij Christiani Populi, ut Antichristianum illud excuterent jugum divinitùs concitati, invocatô Sancto DEI Nomine, in robore virtutis ejus, bestiali illi ferociæ opponere se ausi sunt, et audent: ita vos præ cæteris magis afflicti, dilecti Sympatriotæ ô evigilate tandem! Inclamate Cælos! et in spe misericordis auxilij ejus, succurrite Vobis ipsis, ut laqveis Daibolicis et Vinculis Antichristianis, verè Babylonicis, vos et Posteritatem eximatis tandem. Ecce Deus vester in ultionem exsurgit contrà hostes vestros, suam ergà vos extendens manum! Exsurgite Vos qvoque Deoque vestro porrigite manum! pugNantes Pro DEO, et ejus Verbo, Saluteque vestrâ et posteritatis vestræ fortiter. Auxilium Dei à Vobis stabit. Gladius Dei et Gedeonis vincet, dicite alij ad alios: Ecce Deus noster! Ecce Dominator venit in fortitudine! ecce brachium ejus dominatur. Ecce merces ejus cum illo, et opus ejus coràm illo! (Jes: 40.)
[46/10/5A]
Inprimis autem Vos ad invigilandum publicæ saluti constitutæ divinitùs Potestates, qvocunque eminentiæ gradu et loco, honoratissimi Domini et amici, evigilate! libertatumque vobis Majorum virtute et sangvine partarum, alienâ verò fraude et propriâ socordiâ amissarum, recuperationem nobiscum, propitio Deo, suscipite: ut eas de manu oppressorum nostrorum vindicatas, denuò tradamus illibatas posteris nostris. Deijciamus in nomine Dei de Cervicibus nostris crudele et Antichristianum Papæ, et mancipiorum suorum, jugum! illorum qvi nos sub alienæ dominationis jugum miserunt, et nos Patriæ filios, ab hæreditate nostrâ exclusos, alienigenis mancipârunt. Illi enim qvum ex impuro cælibatu suo nullos legitimos hæredes suscipiant, eôque nullam seriam salutis Patriæ curam habeant, hoc unum ut seipsos pascant, terrenaque ad se rapientes bona, Monasteria et speluncas suas Thesauris impleant, et sic fastu, avaritiâ, libidine magis magisque diffluant agunt. Eja igitur dilecti Amici, Venite! Audeamus Majorum nostrorum pro DEO reassumere Zelum! Audeamus in libertatem asserere nos et Evangelium IESU CHRISTI! Iuvabit nos iniqvitatum osor DEUS, Sicuti juvit Ezechiam, Iosiam, et alios, qvi Dei vivi contrà Idola mortua zelosè egerunt causam. Audeamus dudum in Apocalypsi Iohannis latam in Antichristum, Christi sententiam seqvi, et exseqvi! et proseqvi odio Meretricem Babylonicam, reddereque desolatam et nudam, et manducare carnem ejus, et ipsam exurere igni, et sic abominationem auferre de loco sancto. Iam enim tempus est, jam iniqvitatum suarum omnes implevit mensuras, jam termini Dominationis decurrerunt Bestiæ, et insidentis illi Meretricis, sanctorum sanguine ebriæ. Reddamus illi sicut reddidit nobis! et duplicemus ei duplum, secundum opera ejus, in poculo qvod miscuit nobis, misceamus ei duplum. Ita mandante Deo, cujus nos qvoque sic exseqvemur voluntatem, faciendo Officium nostrum in gloriam Dei et Agni, cum qvo hucusque bellum gessit bestia, et continuare adhuc qværit. Sed vincet Agnùs, et qvi cum illo sunt vocati et electi; et fideles: qvia Rex Regum, et Dominus Dominantium est. etc.**