| Title: | Copy Letter, Dorothy Moore To Andre Rivet, In French |
|---|---|
| Dating: | 23 September 1643 |
| Ref: | 21/3/1A-2B: 2A BLANK |
[21/3/1A]
Monsieur
ie me suis souvente fois proposee vne question touchant nostre sexe, laquelle tombant soubs la theologie; j'ay pensé que la resolution d'icelle par la[altered from le] Doctrine des minstres les plus scavants; comme elle me pourroit[altered from pouroit] estre profitable, ainsi qu'a eux elle ne seroit ny desagreable ny invtile, d'autant que les Docteurs estans poses comme des lampes ardentes et luisantes au temple de Dieu ils doivent communiquer librement leur chaleur et lumier a tous; mais principalement a ceux la qui se mesfians d'eux mesmes a cause de leur ignorance cerchent l'asistance d'autrui pour se rendre prudement et sincerement capables a faire leur devoir envers Dieu, et nullement pour complaire a leur propre curiosité et fantasie. Voila pourquoy Monsieur pour vous obliger (car ie vous honore comme vne luminaire choisi et eminant parmi plusieurs) a donner vostre iugement, ie vous assure[altered] que ie demande vostre opinion comme vne aide a faire fidelement mon devoir selon qu'il appartient a vn vray membre de Iesus Christ. La qu
La question donc est premierement celle cy[altered]: scavoir mon sis les femmes chrestiennes qui sont vnies a Christ et consequement membres de son corps, se doivent[altered] proposer pour leur but Principal, comme ce en quoy Dieu veut estre glorifié par elles (qui est la fin qui gouverne toutes les autres) le service du residu du corps en la communion des saints oui ou non; & si a cecy, il faut dire qu'oui; alores la seconde question doit estre celle cy: ascavoir mon Par quel voye le sexe feminin peut ou doit poursuivre ce but la, sans faire tort a la modestie requise[altered from requises] en leur sexe et sans outrepasser les limites qui defendent aux femmes l'administration publique de la iustice en vne Republique, et de la parole de Dieu en l'Eglise, et que la proprieté de cest vnion. Car il semble que ce sexe peut faire cecy puis que Dieu lui a fait l'honneur d'estre incorporé en son fils; et des membres de son Eglise et que la proprieté de cest vnion nous enseign nostre devoir envers tout le corps. Oultre cecy ie ne voye [catchword: pas]
[21/3/1B]
pas comment il est possible de servir Dieu autrement qu'en ses membres: la Priere, l'ouie, et la lecture de la parole estans[altered] choses, qui sont advantageuses personellement a vn chacun pour soy, et non point telles qui puissent donner vne espreuve envers nostre prochain de nostre sincerité en la pratique de Pieté. [left margin: Mat: 25] ny celles ausquelles nostre seigneur a son arrivee glorieuse semble vouloir avoir esgard pour nous absouldre ou condamner
Cecy donc estant vne chose si fort importante a tous chrestiennes et a moy mesme en particulier; (qui ne desire point d'estre oisiue mais plutost en action selon ma capacité, veu qu'vn employ quoy que le moindre de toutes les servantes du seigneur me seroit a tres grand honneur en son service) i ay voulu[altered] icy requerir vostre iudgement pour me diriger a la pubr pratique de mon devoir, plutost que de m'en donner occasion d'en parler et discourir [partant?] a vostre loisir convenable i attendray vne reponce que contentera le desir de
Mon:
Vostre servante en Christ
Vtrecht septembre 13/23 D: Moore:
[16?] i643
