| Title: | Letter, Consuls & Senators Of Bremen To Hartlib, In Latin |
|---|---|
| Dating: | 4 October 1655 |
| Ref: | 20/10/11A-12B: 12A BLANK |
[20/10/11A]
Nobilissime et clarissime Domine, fautor ac
amice colende.
Accepimus ex tuæ Nobilitatis quondam convictoribus, cum Londoni agerent, Dominis Henrico Meiero et Iohanne Wachman, utriusque juris nunc Doctoribus, nec non illo reip. nostræ Consule ac pro t. Præside, hoc verò Sÿndico nostro, quanto favoris complexu, cum alios reformatæ religionis socios, tum ipsos, tum etiam hanc rempublicam nostram, quæ inter liberas Imperii civitates, hujus religionis unica est, prosecuta sit Nobilitas tua. Neque propensionem hanc deposuisse Nobilitatem tuam, paucis ab hinc septimanis testatum nobis fecit, vir admodum reverendus et Doctissimus; Dominus Philippus auf der Beke, meritissimus Belgicæ nationis Ecclesiastes Londoni, quem honoris causa nominamus. Hisce indiciis atque rationibus ducti, non potuimus, quin in præsentibus reip. nostræ angustiis et ærumnis, (:quarum maximam partem, causæ telonei Oldenburgici, indeque præter spem secuti banni, tum turbis Suecicis, quivus superiori anno infestabamur, debemus:) tuam Nobilitatem præsentibus hisce litteris nostris accederemus, eandemque rogaremus, ut pro ea, qua penes Serenissimi Domini Protectoris Angliæ, Scotiæ et Hiberniæ Celsitudinem, pollet authoritate, nostrarum quoque precum atque Sollicitationum partem aliquam susciperet.
Hac itaque fiducia, ne in earundem enarratione longi simus, Copiam litterarum ad Sereniss: Domini Protectoris Celsitudinem die 25 Augusti hujus anni à nobis per scriptarum, hîc adjecimus, summoperè contendentes, ut hæc ipsa desideria nostra,
[20/10/11B]
imò petita planè invitis nobis extorta, pro necessitate ipsius causæ adeóque pro conservatione hujus reip. non absque insigni reformatorum labe aliquin riunam minantis, Sibi recommendata habeat, et ad optatum finem atque exitum, via quantò licet commodiori perducat.
Opus faciet tua Nobilitas non modò christianæ charitatis, Sed et æternâ nominis memoriâ dignum, totamque hanc civitatem sibi eo nomine perpetuò devinctam habebit, quæ alioquin tributis atque collectis ferè jam exhausta, æri alieno ulterius solvendo impar, metus est, ne in partes atque factiones abeat, atque sic infidiis illorum cedat, à quibus hactenus apertâ vi superari non valuit. Pluribus rem per se periculi plenum non tangimus, nulli dubitantes, quin tua Nobilitas pro sua prudentia totum negotium hoc penitius inspecturo atque ita directura sit, ne omni spei de tuæ Nobilitatis favore atque potentia conceptæ fructu destituamur.
Ingratitudinem non modò verbis sed et factis amoliemur, hisque tuam Nobilitatem quam diutissimè valere et feliciter agere animitus vovemus. Dabantur sub signeto Civitatis nostræ, Die 4ta. Octobris, Anno æræ Christianæ 1655./
Tuæ Nobilitatis
Observantissimi
Consules et Senatores
liberæ Imperialis Reip.
Bremensis./.
