The Hartlib Papers

              LOVIS PAR LA GRACE DE DIEV ROY

                 DE FRANCE ET DE NAVARRE.

A nos amez & feaux Conseillers les gens tenans nos Cours de Parlement, Baillifs, Seneschaux, Preuost, leurs Lieutenans, & à tous autres nos Iusticiers & Officiers qu'il appartiendra, Salut. Nostre cher & bien amé ESTIENNE DE VILLEBRESSIEV de nostre bonne Ville de Grenoble. Nous a fait remonstrer, Que des sa jeunesse il a recherché auec beaucoup de soin de descouurir diuers secrets de la Nature pour paruenir à la connoissance des beaux Arts mesmes des Mecaniques: En quoy il a reüssi si heureusement qu'il a trouué entre plusieurs belles inuentions vtiles & curieuses, celle de quelque Machine toute nouuelle dont la fabrique iointe au mouuement peut eslever promptement beaucoup d'eaux en quelques scituations & hauteurs qu'elles se puissent recontrer: ce qui peut estre aduantageux tant aux Villes & Communautez qu'aux maisons particulieres de la Ville ou de la Campagne, lesdites Machines estans faciles à faire, de peu dépense, & commodes à remuër d'vn lieu a l'autre. Mais parce que s'il les exposoit en public, elles pourroient estre contrefaites: & que par ce moyen il seroit priué de tout le fruit d'vn si long & penible trauail: Il nous a tres humblement fait supplier luy permettre de faire faire lesdites Machines pendant le temps qu'il nous plaira [Et à?] cette fin luy octroyer nos Lettres necessaires, A CES CAVSES de l'Aduis de nostre Conseil, & de nostre grace speciale pleine puissance & authorité Royale, Nous auons permis & permettons par ces presentes signées [do?] de nostre main, audit BRESSIEV de faire bastir, construiré & edifier en tel lieu de nostre obeässance, sur toutes sortes d'eaux courantes & dormantes, en tel nombre que bon luy semblera lesdites Machines de son Inuention seruans à l'eslevation desdites eaux, & autres pour quelque vsage particulier ou public qu'il iügera à propos: Pourueu que ce soit en lieu oú elles nepuissent nuire à la nauigation ou au commerce, & qu'elles n'incommodent point les terres, ni ne diuertissent les eaux des Moulins, & autres edifices des particuliers, ou des Villes & Communautez de nostre Royaume & des pays de nostre obeissance & cependant le temps de six années entieres & complettes, à compter du iour & datte de l'enregistrement des presentes par tout où il appartiendra. Luy permettant en outre d'associer au droit que nous luy accordons telles personnes qu'il voudra poure establir lesdites Machines, & disposer d'icelles ainsi qu'il aduisera bon estre, & comme à luy appartenant. Et au eas qu'il decede auant lesdites six années expirées, sans qu'il eust disposé dudit droict, VOVLONS & nous plaist, Que ses enfans, heritiers & ayans cause, en iouässent pendant le temps qui en restera comme il auroit pû faire auant son decés: Faisans cependant tres-expresses deffences à toutes personnes de quelque qualité & condition qu'elle soient de faire ni faire faire pendant ledit temps des Machines semblables, ni sur la mesme nature demouuement que celles que ledit exposant, ses associez ou ayans cause, auront fait construire en vertu des presentes, en quelque lieu de nostré obeissance, & pour quelque vsage que ce soit, ni les imiter ou contrefaire, sous pretexte d'augmentation, reduction de grand en petit, deguisement de forme ou d'vsage, ou autre supposition que ce puisse estre, sans la permission dudit exposant, sesdits associez, successeurs, & ayans cause, a peine de dix mil liures d'amende, payables sans deport, par chacun des Contreuenans soit Ouuriers, Entrepreneurs, Marchands ou autres de quelque condition qu'ils soient. Et non obstant oppositions ou appellations quelconques applicables, vn quart à Nous, vn qvart aux Hospitaux des lieux où se feront les saisies Et le surplus à l'exposant, ou à ceux qui auront son droit, de confiscation des Machines contrefaites des materiaux, outils & instrumen propres & employez pour icelles & de tous depens, domàges & interests. Pourueu aussi que lesdites Machines soient de l'inuention de l'exposant, & que semblable permission n'ait cy deuant esté accordée à d'autres pou lamesme inuention. A peine de nullité des presentes. SI VOVS, MANDONS & ORDONNONS faire Registrer ces presentes & du contenu en icelles ioüit & vser ledit BRESSIEV, ses associez heritiers legataires ou ayans cause, plainement & paisiblement, sans souffrir ni permettre qu'ils yosoient troublez ni empeschez en quelque sorte que ce soit. Et d'autant qu'on pourroit auoir affaire des presentes en plusieurs lieux, Nous voulons qu'aux copies d'icelles collationnées par vn de nos amez & feaux Conseillers & secretaires foy soit adioustee comme au present Original. MANDONS aussi au premier nostre Huissier ou Sergent sur ce requis, faire pour l'execution desdites presentes tous exploits & actes de Iustice necessaires, sans demander autre conge ni permission: non obstant encore oppositions ou appellations quelconques, pour lesquelles, & sans preiudice d'icelles ne voulons estre differé, Clameur de Haro, Chartre Normande, & toutes Lettres à ce Contraires, ausquelles & aux [catchword: desroga-]

        Collationné à l'Original par moy Conseiller

                  Secretaire du Roy,

        Maison & Couronne de France & de ses Finances

ESTIENNE DE VILLEBRESSIEV, de la Ville de Grenoble, apres vne longue estude de l'Hydraulique, ou Art d'eleuer les Eaux, & vn nombre presque infini d'experiences auec toutes sortes de Machines de cette nature, dans lesquelles il a vicilly; en a inuenté vne qui non seulement par sa figure, parson mouuement & par sa situation est differente de toutes celles qui ont esté connuës & mises en vsage iusques à present pour ce sujet, comme de la Spirale, Coquille, Vis d'Archimede Sciphon, Pompe, Chapelets, Bacquets, ou autres; mais qui plus est, les surpasse toutes en simplicité, & en effets merueilleux & presque incroyables: car auec le mouuement particulier que l'exposant donne & accommode à cette Machine, il fait perdre à l'eau qu'elle embrasse la pesanteur & grauité qui luy est naturelle, & luy fait prendre son cours rapidement de bas en haut en Equilibre, en telle quantité & à telle hauteur qu'on peut raisonablement souhaiter. La grand simplicité, facilité, & commodite de cette Machine est, qu'elle peut estre faite toute de bois, de peu de pieces, en peu de temps, par toute sorte de Menuisiers & Charpentiers, auec peu de frais, ne couste presque rien à entretenir & se peut transporter par vn seul homme d'vn lieu à vn autre, peut nager sur l'eau, & s'eleuer ou baisser à mesme que l'eau, n'est point sujette au frayement des piuots ou essieus, ni de se froisser facilement par aucun attouchemont violent de ses parties; enfin elle peut agir toute seule fort long-temps, sans que la presence d'aucun conducteur y soit necessaire, quand elle a esté bien placee & jointe à son moteur donne. L'vtilite extrême quel'on en peut tirer est, que tout ce que l'on fait par les autres machines auec grande peine, grands frais, & peu d'effet, auec celle-cy on le peut faire beaucoup plus facilement, plus abondamment, plus promptement, et auec moindre dépence; et outre cela l'on peut faire par son moyen des choses du tout impossibles par toutes les autres Machines d'esja connuës. PREMIREMENT donc auec cette Machine en peut embellir les lieux de plaisir, par toute sorte des Fontaines, Canaux lets d'eaux, Cascades, Napes, Boüillons & tel autre artifice que l'on voudra. Secondement, on peut éleuer l'eau des Rivieres aux lieux voisins de quelque hauteur qu,ils soient, en faire des prez & jardinages, & rendre fertiles les terres qui sont incultes. 3. On peut desseicher les Marets, Estangs, Lacs & pais inondés; Ouurage si important, soit pour l'estenduë des terres qu'ils couuerent, soit pour l'estendue des terres qu'ils couuerent, soit pour rendre plus sain l'air des pais qu'ils infectent, que les Souuerains ne font pas mesme difficulté de donner ces lieux à ceux qui entreprennent de les desseicher. 4. On peut ou remplir, ou épuiser les Fossez des Villes & places de guerre en quelque situation qu'elles puissent estre; faire des Moulins au dedans auec l'eau d'vne Fontaine, d'vn Puits, on d'vne Cisterne seulement; & en fournir en tous les endroits & à tous les Habitans & artitisans suffisament pour leur necessité & occupation, & pour lauer & nettoyer les rues sans peine et sans frais, & emporter incessamment par vn canal particulier les matieres & immondices des latrines d'vn chacun qui sont cause de grandes infections d'air & de plusieurs maladies, lors qu elles ne sont pas soigneusement nettoyées. 5. On peut enfin par cette inuention, joindre pour le commerce non seulement les ruisseaux, & les Rivieres, mais encor les Lacs & les Mers, auec des canaux dans lesquels élevant les eaux basses, a telle hauteur & en telle quantité, qu'il sera besoin, & par des lieux commodes les lieux éleuez ny mesme les rochers ou montagnes ne rendront plus ces jonctions impossibles, comme elles ont este trouuées iusques icy par les voyes ordinaires; à cause de l'immense profondeur dont, il faloit faire les canaux pour receuoir les Eaux du voisinage qui d'ordinaire s'amassent seulement dans les profondes vallées; & qu'il les falloit quelque fois faire passer à trauers de grands Rochers & de hautes Montagnes: lesquelles difficultez cesseront, lors qu'il ne sera plus besoin de s'attacher aux lieux bas pour receuoir les Eaux, mais qu'on les pourra éleuer iusques à la hauteur des lieux comodes, pour faire les canaux necessaires & aisés à ces jonctions, & au commerce: Non plus qu'il ne faudra plus craindre que les Lacs ou Mers qui se pourront joindre, ne submergent & inondent les pais, puisque par cette Machine, elles y monteront plustost que d'y descendre, & ainsi il sera aisé d'empescher qu'ils ne communiquent leurs eaux aux autres lieux plus qu'on ne voudroit. Cette Inuention estant si belle & si vtile il semble que l'Autheur seroit bien fondé à esperer des recompenses extraordinaires; mais il n'en demande point d'autre que celle qu'il pourra tirer de la chose mesme, & qu'on accorde sans difficulté aux moindres inuentions nouuelles, qui est vn priuilege de consruire sa Machine aux lieux où elle sera vtile, auec deffenses pour certain temps a toutes sortes de personnes de se seruir de ladite Machine sans son consentement, ny la contrefaire quand il l'aura mise au jour. Et cette Machine n'ayant esté inuentée que pour la plus grand vtilité du public & des particuliers; Il ne pretend point parson inuention diuertir les Eaux des moulins & autres edificés des particuliers ou des Villes, & Communautez & nuire à la nauigation ou au commerce, ni incommoder les terres ou bastimens d'aucuns si ce n'est par leur consentement, & pour le plus grand bien & vtilité de ceux ausquels ces choses appartiendront. Ce qu'il propose, non sur de vaines imaginations ou de foibles conjectures, comme il est arriué à beaucoup d'autres; mais sur des raisons solides, verifieés par vne infinité d'experiences, & par diuers essays sur plusieurs figures de cette Machine, tant en grand qu'en petit, en presence mesme de grands Ingenieurs & autres personnes tres-intelligentes dans ces choses, qui l'ont veuë auec admiration, & en ont esté pleinement satisfaits. Neantmoins pour répondre a ceux qui croyent et soustiennent que l'on ne peut rien adjouster de mieux aux choses decouuertes par les Anciens, & qu'il est impossible de doner rien de nouueau qui soit utile au public l'on n'a qu'à leur mettre en auant la Poudre à Canon, la Boussole, l'imprimerie, la Pompe & les Lunettes d'approche, qui sont toutes Inuentions nouuelles & inconnuës aux Anciens: Et ce que l'on raporte de Christophle Colomb, est aussi digne de remarque, qui ayant proposé en France vne chose qui sembloit en apparence s'opposer au sens commun, & suiuant quelques-vns mesmes à la Foy Chrestienne, pour y auoir esté rebuté, s'addressa à l'Espagne, qui profite encor auiourd'huy par la decouuerte du nouueau monde des grands auantages que la France a perdus par ce refus. Toutes ces considerations font esperer audit Villebressieu que son inuention sera bien receuë tant en France; que parmy les Nations estrangeres; & si'il a ce bonheur il promet de donner encor au public l'augmentation & perfection du sciphon tout droit et à vne seule colomne, qui verse l'eau en abondance & sans intervale par son hout bout; Comme aussi de la pompeforceé, où il comprime l'air auec l'eau; Et de la balancée, ou il ne faut pas plus de force pour éleuer l'eau par vn tuyau de six pieds de hauteur que par vn de 48 quoy qu'ils soient égaux en diametre ou en grosseur. Il donnera aussi l'inuention d'vn [Cone?] spiral nageant sur l'eau qui en éleuera telle quantité & à tell hauteur que l'on peut raisonnablement desirer: Et par la situation particuliere qu'il donne a sa Machine, il rendra l'vsage des autres meilleur et plus prompt comme de la Vis Archimede, & de la Coquille, les quels l'on n'a sceu encor reduire en vsage à l'vtilite publique. Ce qui a fait desia esperer à quelques bons esprits qui ont veu sa machine, & sa raison simple & toute naturelle, que dores-en-auant l'on pourra venir à bout par son moyen de mouuement de soy ou continuel. Et à l'instruction de toutes ces choses, il joindra la figure de chacune des susdites Machines./.