| Title: | List Of Experiments By Renner, In Latin |
|---|---|
| Dating: | undated |
| Ref: | 1/33/106A-B |
[1/33/106A]
N. Reneri, Professoris Ultrjectini, [Experimenta ]altered. Ecce Catalogum brevem nonnullorum meorum Experimentorum: dum aliàs justæ longitudinis Catalogum, de omnis generis artificiis ac secretis transmittere liceat! 1.) Cosmeticum Reginæ Matris, cum aliis Cosmeticis tutis ac salubribus. 2.) Variæ rationes secretissimæ communicandi cum absentibus. 3.) Magnetica experimenta, Gilberto et aliis incognita, ex propriâ inventione. 4.) Perspectiva secreta admiranda, jucunda, utilia, circa picturas ac delineandi artem, ex propriâ potissimùm inventione. 5.) Vitra temperamentorum aëris. qvæ aliàs Calendaria dicuntur, multò meliora et accuratiora, ex propriâ inventione. 6.) Palatia, templa, hortos. &c. repræsentare extra cubiculum, sine adminiculo dioptricæ [altered] aut catoptricæ[altered], ex propriâ inventione. 7.) Iridem suscitare cælo sereno, qvæ nec splendore, nec magnitudine apparente, cedat naturali, qvæque in ipso cælo esse videatur; ex propriâ inventione. 8). Cubiculum Magicum, beneficio Magiæ Naturalis, tale exstruere ac præparare: in qvo mirabiliora & magis stupenda repræsententur, qvàm ab aliis fieri possit: ex propriâ inventione. 9.) In Chymicis, Alchymicis, Medicinâ, Mechanicis artibus, Magiâ Naturali, pluri-
[1/33/106B]
ma habeo, partim ab expertissimis, partim ex propriâ inventione, qvæ nimis longum esset recensere. Itaque hîc sisto: rogans, ut ulteriùs liceat cum expertissimo vestro Huniade [communicare blotted] per literas. Ac si qvidem secreta aliqvot alicuius momenti, et probè experientiâ comprobata, mihi communicet: experietur vicissim candidissimum ac liberalissimum pectus in reciprocâ præclarorum arcanorum communicatione. Nunc mitto Vitrum contextum, pixide inclusum: cujus usus duplex esse potest: alter ad observandos novos planetas, qvi circa Iovem feruntur[altered by H.]; et qvos primus Galilæus de Galilæis telescopio depræhendit: Alter (et potissimus) usus est ad repræsentationem pulcerrimam qvarumlibet rerum in cubiculo obscuro: dum loco perspicilli vulgaris, hoc vitrum latius foramini fenestræ adaptatur, Sole insigniter illustrante res externas.