[253ra] et bien le savoient les Turs et les Tartres et les mescreans qui congnoissoient les proesces de lui et les haultes emprinses, et pour ce, pour le destruire marchanderent ilz a son frere Jaquet1 de lui occirre et murtrir, et fist occirrea devant lui le gentil roy son frere gisant en son lit. Ce fu bien ennemie chose et mauvais sancb de occirre et murtrir si vaillant homme comme le roy de Chippre, qui ne tendoit ne ne ymaginoit nuit ne jour a autre chose fors qu’il peust acquitterc la Sainte Terre et mettre hors des mains des mescreansd. Et quant les Genevois qui moult l’amoient – c’estoit raison, car il faisoit moult a amer – sceurent les nouvelles de sa mort, ilz armerent .vij. galeese et les envoierent en Chippre, et pristrent de fait la cité de Famagouse2, et Jaquet dedens, et coururent la greigneur partie du royaume. Et se ilz n’en cuidassent pis valoir, ilz l’eussent destruit, mais pour tant que les villes y sont fortes et font frontiere aux Turs, ilz les laissierent es mains des hommes des lieux, excepté la cité de Famagouse, mais celle tiennent ilz pour eulx et la gardent. Et quant ilz l’eurent conquise premierement ilz en osterent si grant avoir que sans nombre, et admenerent avecques eulx en Gennes ce Jaquet qui avoit murtri son frere, pour savoir que li Genevoisf en vouldroient faire. Voirs est que le roy de Chippre avoit un beau filz le quel ilz marierent et couronnerent a roy, et mistrent ce Jaquet en prison destroite, et n’eurent point conseil du faire mourir, mais tousjours tindrent ilz Famagouse. Je ne sçay se ilz la tiennent encores. [253rb] Et mourut sur son lit le jeune filz3 au roy de Chippre, dont les Genevois furent moult courrouciez, mais amender ne le peurent, et demoura la terre sans hoir. Je ne sçay qui la gouverne maintenant, mais en l’an que je fu en l’ostel du conte de Fois, il me fu dit d’un chevalier de Berne, le seigneur de Valenchun4, que les Genevois y avoient grant part et tenoient Famagouse, et avoit le paÿs couronné a roy ce Jaquet par defaulte de hoir ; ne sçay comment ne par quelle dyablie il estoit issus et delivrez hors de prison et des mains des Genevois.
Quantg le roy Lion d’Ermenie vint premierement en France5 devers le roy et les seigneurs, on li fist bonne chiere – ce fu raison, car il estoit venus de loingtain païs – et sceut on par lui et par ses gens toutes nouvelles du royaume de Grecce et de l’empire de Constantinoble, car bien sachiez il fu enquis et examinez justement de la puissance des Turcs et des Tartres, et lesquelz l’avoient mis et bouté hors de son royaume. Tant comme a ces enquestes et demandes le roy d’Ermenie respondi que le grant tacon de Tartre6 li avoit tousjours fait guerre et lui avoit tollu son royaume.
« Et cil tacon de Tartarie, demanderent ceulx qui parloient, est il puissant homme ?
– Oïl, voir, dist il, car par puissance il a sousmis avecques l’aide du soudant l’empereur de Constantinoble7.
– Est donc, demanderent li seigneur, Constantinoble a la loy des Tartres ?
– Nennil, voir, dist il, mais le tacon et le soudan ont guerroié longuement l’empereur de Constantinoble et a convenu enfin, autrement li emperieres ne pouoit avoir paix, que li emperieres de
- Jacques de Lusignan, né vers 1344 ; mort le 9 septembre 1398, frère de Pierre 1er, roi de Chypre ; responsable en 1369, à la tête d’une faction de nobles, de l’assassinat de celui-ci. Devint lui-même roi de Chypre (1382-1398) à la mort de son neveu, Pierre II (qui régna de 1369 à 1382). Avec la prise de Kyrenia en 1374, il fut envoyé en hôtage à Gênes.
- Famagouste, Chypre. La ville tomba entre les mains des Génois en 1373, contraignant les Lusignan à de lourds tributs.
- Pierre II, mort en octobre 1382 à l’âge de 26 ans (il n’avait que 13 ans à la mort de son père Pierre 1er en 1369 ; couronné roi de Chypre puis de Jérusalem en 1372).
- Raimon de Balansun.
- En 1378 selon l’Art de vérifier les dates ; en 1384 selon Fr. Autrand, Charles VI.
- Le grant tacon de Tartre : Tamerlane ou Timur, fondateur mongol de la dynastie des Timurid. Conquérant, vers la fin des années 1380, d’Arménie, de Géorgie et d’Azerbaijan. Mort en 1405 (voir Beatrice Forbes Manz, The Rise and Rule of Tamerlane, 1989). Autre possibilité : le khan de la Horde d’Or, Toktamish?
- Jean V Paléologue (empereur byzantin de 1341 à 1376, puis de 1379 à 1391). Sur l’histoire de Byzance à cette époque consulter R. Fossier, Le Moyen Âge (Paris, 1982), 3 vols, iii, ch. 4.