The Online Froissart

Facsimile mode Settings Browse | Collate

pb 5 v

Ainsi estoit meuz et encouragiés
mesire Jehan de Haynau et faisoit
sa semonce et sa priere des Hainuiers a
estre a Halle et les Brebançons a estre a
Bredas et les Behaingnons au Mont
Sainte Guertrud et les Hollandois, dont
il ot aucuns, ordonnéz a estre en Dordrecht.
Lors prist congié la royne d’Engleterre au
conte de Hainau et a la contesse et les
remercia grandement et doucement de
l’onneur de la feste et de la bonne chiere
et belle recueillete qu’ilz lui avoient fait
et le baisa au partir et la contesse et
leurs beaux enfans. SHF 1A-11 sync Ainsi se party la
dame et son filz et toute leur route acom
paigniés de monseigneur Jehan de Hainau,
qui a grant durté et moult envis avoit
eu congié de monseigneur son frere, quoyqu’il
se fust de premier accordéz et assentiz a
ce voiage, mais finablement il lui donna
de bonne voulenté, et lui dist ainsi mesire
Jehan par trop beau langaige : "Monseigneur, je
sui joenne et encore ay a faire de conseil
si croy que Dieu m’ait pourveu de ceste
emprise pour mon avancement et se
Dieux m’en vaille, le courage m’en siet
trop bien que nous en venrons a nostre
dessus car je cuide et croy de verité que
par pechié a tort et par envie on a ceste
bonne royne dechaciee et son filz hors
d’Engleterre. Si est aumosne et gloire a
Dieu et au monde d’adrecier et reconforter
les desconfortéz et desconseilliés, especialment
si noble et si haute dame comme ceste cy est,
qui fu fille de roy et est descendue de royal
ligne et sommes de son sang et elle du nostre.
Je aroie plus chier a renoncier a tout ce
que j’ay vaillant et aler servir Dieu oultre
mer sans jamais retourner en ce paÿs,
que la bonne dame fust partie de nous sans
confort et aide. Si me laissiés aler et donnéz
congié de bonne voulenté, si feréz bien
et vous en saray gre et s’en exploiteront
mieux mes besoingnes." Comment la royne
passa en Engleterre. Quant le bon
conte de Hainau ot oy son frere et
apparçut le grant desir qu’il avoit de
faire ce voiage qui a treshaute honneur
lui pouoit retourner et a ses hoirs, et
tousjours mais et congnois bien qu’il dist

verité, si en ot grant joie et lui dist : "Beau
frere, ne plaise ja a Dieu que vostre bon propos,
je vous brise ne oste et je vous donné congié
au nom de Dieu." Lors le baisa et lui estraindy
la main en signe de tresgrant amour. Ainsi
se party mesire Jehan de Hainau et s’en vint
ce jour gesir a Mons en Hainau et aussi la
royne d’Engleterre. Que vous esloigneroie
la matiere? Ilz firent tant par leurs journees
qu’ilz vindrent a Dordrecht en Hollande, ou
l’especial mandement estoit fait. La endroit se
pourveirent de nefs, de vaisseaux grans
et petiz, ainsi qu’ilz les porent trouver et
mistrent dedens leurs chevaux, leur harnois
et leurs pourveances. Puis se commanderent
en la garde Nostre Sire et se mistrent en chemin
par mer. La estoient de chevaliers henuiers
avec monseigneur Jehan de Hainau, mesire Henry
d’Antoing, mesire Michiel de Ligne, le sire
de Gommegnies, mesire Perceval de Semeries,
mesire Robert de Baillueil, mesire Sansés de
Bousoit, le sire de Vertaing, le sire de Potelles,
le sire de Villers, le sire de Henin, le sire de
Sars, le sire de Bousies, le sire d’Aubrecicourt,
le sire de Strumiel, mesire Olfart de Guistelle
et pluseurs autres chevaliers et escuiers tout
en grant desir de servir leur maistre.
Quant ilz furent departiz du havene
de Dordrecht, moult estoit la navie
belle selon leur quantité et bien ordonnee
et le temps beaux et seriz et le temps estoit
asséz moiste et atrempéz, et mirent a
l’ancre ceste premiere maree devant
les diques de Hollande sus le departement
de la terre. L’endemain ilz se desancrement
et sachierent leurs sigles amont et se
mistrent en chemin en costoiant Zeelande
et avoient entente de prendre terre a un
port qu’ilz avoient avisé, mais ilz ne
porent car un grant torment les prist
en mer qui les mist si hors de leur chemin
qu’ilz ne sceurent dedens II jours la
ou ilz estoient, de quoy Dieu leur fist grant
grace et leur envoia belle aventure. Car
se ilz se fussent embatu en ce port qu’ilz
avoient avisé ou auques pres ilz estoient
perduz davantage et escheuz es mains
de leurs ennemiz qui bien savoient leur
venue. Si les atendoient la endroit pour
eulz tous mettre a mort et le joenne pb 6 r

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.