pb 217 vploittier que ceulx a cheval. Si desploierent ces seigneurs leurs bannieres et detrierent un petit pour ce qu’ilz vouloient avoir leurs brigans. D’autre part messire Eustace avoit pris le fort d’une vigne sur une petite montaigne. Si veoit III batailles de François dessoubz lui et en chascune autant de gens par semblant que il y avoit en sa route, mais de ce n’estoit il point effraié. Ains disoit a ses gens: "Seigneurs, seigneurs, combatons nous de bon courage. Ceste journee sera nostre. Et puis serons seigneurs de ce païs. J’ay plusieurs fois oÿ compter qu’il y a eu jadis un conte en Champaigne. Encores pourroie je tant de service faire au roy d’Angleterre que je tiens pour roy de France, car il chalenge la couronne de France, que par avanture il me donroit la conté". De ces paroles se resjoïssoient ses compaignons et disoient: "Par monseigneur saint George, sire, nous y mettrons peine."
¶Adont appella il aucuns escuiers qui la estoient telz que Courageux de Mauny, un sien cousin, Jehan de Paris, Martin d’Espaigne et plusieurs autres et les fist chevaliers, et puis ordonna toutes manieres de gens aler a pié et retaillier chascun glaive au volume de V piéz; les François qui veoient leur convenant les desiroient moult a combatre, mais ilz attendoient leurs brigans qui point ne venoient pour les faire assaillir et escarmouchier contre les archiers et pour attraire messire Eustace et sa bataille hors de leur fort, mais messire Eustace ne l’avoit mie en propos. Ains, se tenoit franchement sur la montaigne, son pennon devant lui qui estoit d’ermines a II hamedes de gueules.
SHF 1-443 sync Cy commente la bataille de Nogent et des Anglois qui furent desconfis.Quant messire Broquars de Fenestraiges, qui moult estoit hardy chevalier, vit que la bataille de messire Eustace ne se deslogoit point de la montaigne, il dist: "Alons, alons a eulx, il les nous fault combatre a quelque meschief que ce soit." Adonques lui, l’evesque de Troyes et leur bataille s’avancerent et vindrent combatre contre les Anglois, qui les receurent moult aigrement, en tele maniere que plus de LX François furent rués par terre a celle empainte et eust esté desconfite sans remede quant la seconde bataille, que messire Jehan de Chalon et le conte de Joingny menoient, y survnt, qui grandement reconforta la premiere, qui estoit ja presque toute esparse, et la furent faites pluseurs appertises d’armes et maints hoàmmes et chevalx navrés du trait des archiers anglois, qui grandement s’y portoient. Et tantost aprés se hasta de venir la tierce bataille, que le conte de Widemont menoit, et lors commença bataille dure et aspre. La veissiés maintes prise et mainpb 218 r
