The Online Froissart

Facsimile mode Settings Browse | Collate

pb 94 r

qui nouvellement estoient revenuz d’Aguillon,
et leur dist qu’ilz se traissent devers Caen
et se tenissent la et gardassent la ville et
la marche contre les Englois. Ceulx respon
dirent que voulentiers feroient leur pouoir.
Si se partirent du roy et de Paris atout
grant foison de gens d’armes et toudiz
leur en venoit et chevaucierent tant qu’ilz
vindrent en la bonne ville de Caen, ou ilz
furent receuz a grant joie des bourgois
et des bonnes gens d’environ qui s’estoient
la retrais. Si entendirent les dessus dis
seigneurs aux ordonnances de la ville, qui
pour le temps n’estoit fermee et aussi a
faire armer et appareillier et pourveoir
d’armeures chascun selon son estat.
SHF 1-256 sync Quant la navie du roy d’Engleterre
eut priz terre en la Hogue Saint
Vaast pres de Saint Sauveur le Viconte,
l’eritage monseigneur Godefroy de Harecourt,
et elle fu la toute arrestee et ancree sur
le sablon, le dit roy yssi de son vaissel et du
premier pié qu’il mist sur terre, il chei si
roidement que le sang lui vola hors du néz.
Adont le prindrent ses chevaliers qui deléz
lui estoient et lui distrent : "Chier sire, retraiéz
vous en vostre nef et ne venéz maishuy
sur terre car veéz cy un mauvais signe pour
vous." Dont respondi le roy tout pourve
uement et sans delay : "Pourquoy? Mais
est un tresbon signe pour moy car la
terre me desire." De ceste responce furent
ces gens tout resjoiz. Ainsi se loga le
roy ce jour et la nuit et encore l’endemain
tout le jour et toute la nuit sur le sablon.
Endementiers descharga on la navie
des chevaux et de tout leur harnois
et eurent conseil la en dedens com
ment ilz se pourroient maintenir. Si
fist le roy II mareschaux en son ost, l’un
monseigneur Godefroy de Harecourt et l’autre
le conte de Warvich, et connestable le
conte d’Arondel. Et ordonna le conte de
Hastidonne a demourer sur la navie a
C hommes d’armes et IIIIC archiers. Puis
eurent autre conseil comment ilz chevau
ceroient. Ilz ordonnerent leurs gens en
III parties. L’une bataille yroit d’un léz
tout serrant la marine a destre et l’autre
a senestre et le roy et le prince son filz

yroient par terre. Et devoit toutes les nuis
la bataille des mareschaux retraire ou
logeis du roy. Si commencierent a chevaucier
et aler ces gens d’armes ainsi que ordonné
estoit. Ceulx qui s’en aloient par mer selon
la marine, prenoient toutes les nefs grandes
et petites qu’ilz trouvoient et les enmenoient
avec eulx. Archiers et gens de pié aloient
de costé selon la marine et roboient tout
ce qu’ilz trouverent. Et tant alerent ceulx
de mer et ceulx de terre qu’ilz vindrent
a un port de mer en une forte ville que
on claime Harefleu et le conquistrent
tantost car les bourgois se rendirent
pour doubtance de mort mais pour ce
ne demoura mie que toute la ville ne
fust robee et pris or et argent et chiers
joyaux. Car ilz en trouverent si grant
foison que garçons n’avoient cure de
draps fourréz de vair. Et firent tous les
hommes de la ville yssir de leur ville et
entrer es vaisseaux avec eulx pour ce
qu’ilz ne vouloient mie que ces gens se peusent
rassembler pour eulx grever quant ilz
seroient oultre passéz. SHF 1-257 sync Comment le roy d’En
gleterre destruit grant terre en Normandie.
Aprés ce que la ville de Harefleu fu
prise et robee sans ardoir, yceulx
Englois s’espardirent parmy le paÿs
selon la marine. Si y firent une grant
part de leurs voulentéz car ilz ne trou
verent homme qui leur deveast. Tant
alerent qu’ilz vindrent a une ville grosse
et riche et port de mer qui s’appelle
Chierebourc. Si en ardirent et roberent
une partie mais dedens le chastel ilz ne
peurent entrer car ilz le trouverent
trop fort et bien garny de gens d’armes.
Puis passerent oultre et vindrent vers
Montebourch d’Avalongue,³⁹ si le prindrent
et roberent toute. Puis l’ardirent et
en telle maniere grant foison de villes
en celle contree et conquistrent moult
grant avoir. Aprés vindrent a une moult
grosse ville et bien fermee que on appelle
Quarentin. Si l’assaillirent vistement et
fierement. Quant les bourgois virent
ce, ilz eurent grant paour de perdre corps
et avoir, leurs femmes et leurs enfans
maugré les gens d’armes et soudoiers pb 94 v

Display By:	Folio Manuscript Chapter SHF Chapter

Manuscript:
Navigate By:	Folios Manuscript Chapters Edition Chapters Printed Editions
Go To:

Return to Manuscript

Facsimile	Manuscripts are displayed with a layout and visual style which reflects the original manuscript as closely as possible.
Edition	Manuscripts are displayed in a more readable style resembling a modern edition.
Synchronise by word	Every collated word becomes a link. Clicking on a word will synchronise all open manuscripts to that word.
DMF	With this setting, every word becomes a link to the online Dictionnaire du Moyen Français (DMF). Clicking on a word opens a window listing relevant entries on the DMF website.

Horizontal	Viewing windows extend horizontally across the page.
Vertical	Viewing windows extend vertically down the page.